A Batalla de Stalingrado ye una batalla d'o Frent Oriental en a Segunda Guerra Mundial, considerata como o punto d'inflexión d'a guerra en o Frent Oriental y a batalla que fació mes mortalera d'a historia d'a humanitat, comparata a vegatas con o segundo seche de Zaragoza.
S'i enfrontinoron as tropas d'a Wehrmacht alemana d'o Tercer Reich y los suyos aliaus (Regio Esercito italiano, Exercito rumano, Exercito hongaro y unidaz menors de tropas de Croacia) y l'Exercito royo sovietico entre o 21 d'agosto de 1942 (encomenzamiento d'o seche de Stalingrado por as fuerzas de l'Eixe) y lo 2 de febrero de 1943 (rendicion d'o 6º Exercito alemán). Estió una victoria decisiva d'os sovieticos. As fuerzas de l'Exe perdioron 850.000 hombres, u siga, un cuarto d'as suyas fuerzas en o Frent Oriental, y muito material. No bi ha cifras oficials d'as perdas humanas sovieticas por a censura estalinista. As Potencias de l'Eixe nunca ya no podioron recuperar-sen y encomenzoron una larga retirata.
A luita en a ciudat prencipió luego de que Hitler prenió a decisión de conquerir a ciudat de Stalingrado, que portaba o nombre de Stalin, o líder d'a Unión Sobietica. Ta lograr iste obchectivo, bi ninvió as prencipals fuerzas que, seguntes o Fall Blau, teneban que abanzar dica o Caucaso ta conquerir os pozos petroliferos d'a redolada, que yeran a prencipal fuent de suministro d'iste combustible estratechico ta o Exercito Royo. Prencipió asinas una luenga serie de luitas en o corazón d'a ciudat, luitas que desgastoron o potencial militar d'a Wehrmacht, que habría estato millor emplegato en os territorios ubiertos d'a Unión Sovietica. En istas luitas as tropas alemanas no logroron a conquiesta total d'a ciudat, y dende noviembre de 1942 una contraofensiva d'o Exercito Royo contra as alas d'o dispositivo alemán, confiatas a os exercitos rumano y hongaro, con muit poca capacidat defensiva, redotoron a istas tropas y cercloron a o 6º Exercito alemán. Os alemans cerclatos, mandatos por Friedrich Paulus, se rindioron a os sovieticos o 2 de febrero de 1943, rematando asinas a batalla con una clara victoria sovietica, encara que tropas panzer mandatas por Erich von Manstein miroron de rescatar a las tropas cerclatas. Antiparte, en as operacions de suministro d'as tropas cerclatas, a Luftwaffe, a fuerza aeria d'o Tercer Reich, mandata por Wolfram von Richthofen, tamién tenió perdas considerables de material y de pilotos experimentatos.
Vinclos externos
Referencias
Categoría:Batallas d'o Frent Oriental (Segunda Guerra Mundial) Categoría:Batallas de 1942 Categoría:Batallas de 1943 Categoría:Batallas d'Alemanya Categoría:Batallas de Croacia Categoría:Batallas d'Italia Categoría:Batallas d'Hongría Categoría:Batallas de Rumanía Categoría:Batallas d'a Unión Sovietica