Os anuros (nombre cientifico Anura) son a orden con mes numero d'especies d'os anfibios actuals. Se diferencian d'os atros anfibios en no tener coda y en tener as patas zagueras largas y adaptatas ta brincar. En aragonés, as especies d'anuros son conoixitas popularment como "ranas" u "granotas" y "zapos".
Os anuros se reconoixen facilment por l'ausencia de coda y por a doble longaria d'os miembros posteriors respecto a los anteriors. O movimiento d'os miembros posteriors se fa d'a mesma traza que un muelle, que se contraye y s'expande, o que representa una locomoción brincadera, con sincronización de movimientos d'as dos patas posteriors que ye caracteristica d'este grupo.
A cintura pelviana ye bien osificata en relación a los atros anfibios ta poder fer de refirme d'os miembros posteriors. A rechión sacra por un regular ye marcata con una vertebra diferent a las atras d'o cuerpo y por detras bi ha unas vertebras caudals fusionatas en urostilo.
O cubito y radio son fusionatos, a l'igual que a tibia y peroné. En o piet posterior os uesos d'a planta y os didos son prolargatos.
A cintura peitoral ye a-saber-lo d'osificata y en bi ha dos tipos basicos con variacions. A diferencia d'os urodelos y apodos tienen encara uesos dermicos en a cintura peitoral por eixemplo en as claviculas.
En o cranio os uesos frontals y parietals son fusionatos en un gran complexo dorsal, y presentan tamién centros formatos por osificacions d'os arcos neurals que resultan d'a condrificación y posterior osificación d'as vainas notocordals. Se'n distingue tres tipos: ectocordal, holocordal y estegocordal. O numero de vertebras troncals queda reducito a 5 - 9 representando un alcurzamiento d'o cuerpo, talment ligato a ixe tipo de locomoción brincadera que fan, como tamién l'ausencia de cuello, que no deixa que a cabeza se desvíe lateralment cuan se brinca.
Os anuros son formas muito activas y tienen uellos grans y parpiellos mobils. O tempán ye superficial y gran. A larinche ye bien desarrollata y a producción de sonitos ye important en o comportamiento territorial y sexual. Bi ha bolsas y sacos bucals que actuan como cambras de resonancia cuan fan o suyo cante carateristico, que ye o "ranueco".
A fecundación ye externa y a reproducción ovipara con excepcions. A mayoría presentan un desembolic larvario libre, o cullarón.
Clasificación d'as familias d'anuros Suborden Archaeobatrachia. Familia Ascaphidae. Familia Bombinatoridae. Familia Discoglossidae. Familia Leiopelmatidae. Suborden Mesobatrachia. Familia Megophryidae. Familia Pelobatidae. Familia Pelodytidae. Familia Scaphiopodidae. Familia Rhinophrynidae. Familia Pipidae. Suborden Neobatrachia. Familia Allophrynidae. Familia Arthroleptidae. Familia Astylosternidae. Familia Brachycephalidae. Familia Bufonidae. Familia Centrolenidae. Familia Dendrobatidae. Familia Heleophrynidae. Familia Hemisotidae. Familia Hylidae. Familia Hyperoliidae. Familia Leptodactylidae. Familia Limnodynastidae. Familia Mantellidae. Familia Microhylidae. Familia Myobatrachidae. Familia Nasikabatrachidae. Familia Petropedetidae. Familia Ranidae. Familia Rhacophoridae. Familia Rheobatrachidae. Familia Rhinodermatidae. Familia Sooglossidae.
Se veiga tamién Caudata Cullarón Chenero Rana Guardafuents Rana Ranueco (anuros) Zapo
Referencias
Vinclos externos
*