O Kick'em Jenny ye un volcán submarino activo situato en a mar Caribe a 8 km a o norte d'a isla de Grenada y alto u baixo 8 km a l'ueste d'a Isla Ronde en as Granadinas. Kick'em Jenny tien una altaria de 1.300 m sobre o fundo d'a mar en a versant interior occidental d'as Antillas Menors. A placa tectonica norteamericana ye subducindo a la placa tectonica caribenya a l'este d'iste volcán y por debaixo d'as Antillas Menors
O primer rechistro documental d'o volcán estió en 1939, encara que ya heba tenito erupcions muitas vegatas antis d'ista calendata. O 23-24 de chulio de 1939 una erupción crebó a superficie d'a mar, chitando una nube de vapor y repuis volcanicos a una altaria de 275 m. sobre a superficie y chenerando una serie de tsunamis d'alto u baixo dos metros d'altaria que arriboron a las costas d'o norte de Grenada y o sud de Sant Vicent y as Granadinas. En 2003, a tuca d'o volcán plegó a una altaria de 180 m. baixo a superficie d'a mar y se creye que ha remanito constant dende os anyos 1960.
O volcán ha tenito a o menos doce erupcions entre 1939 y 2001 (a zaguera o 4 d'aviento de 2001), encara que denguna d'a posteriors erupcions ha estato tan gran como la de l'anyo 1939 y a mayoría nomás s'han detectato sismicament. As erupcions grans s'han puesto ascuitar tamién baixo l'augua y en superficie en as islas amanatas como un zurrumbito.
En l'anyo 2003 una expedición submarina detectó a caldera d'o volcan con chamineras activas chitando bombollas de gases fredos y calients. Se i replegoron muestas de olivina y basalto. Una estructura en forma d'arco s'espaldó en a suya versant occidental, estando probablement a fuent d'as restas de rocas que bi ha en a zona que se troba mas amán de Grenada.
Etimolochía O volcán yera desconoixito antis de 1939, encara que "Kick'em Jenny" apareixe en mapas anteriors como o nombre d'una chicota isla dita agora Diamond Rock (u Île Diamante), u como o nombre d'o estreito entre Grenada y a isla Ronde (u Île de Ronde). O nombre en si mesmo fa referencia a que a vegatas as auguas d'iste estreito son prou furas.
Referencias
Categoría:Volcans de Grenada