Tomás Castellano Villarroya, naixito de Zaragoza (comarca de Zaragoza) o 5 de mayo de 1850 y muerto en Madrit (Espanya) l'11 de chunio de 1906, estió un politico y empresario aragonés, militant d'o Partido Conservador, que mientres a suya carrera politica plegó en os cargos de ministro d'Ultramar (1895-1897) y ministro d'Hicienda (16 d'aviento de 1904-27 de chinero de 1905).
En os inicios d'a suya carrera estió vinculau a la comarca de Cinco Villas, estando esleito deputato en a Deputación Provincial de Zaragoza en 1878 y 1879 por o partiu chudicial d'Exeya d'os Caballers, encara que dimpués (y dica a suya muerte, en una succesión de trece lechislaturas) n'estió por o districto de Borcha-Zaragoza. Sindembargo, continó con a suya vinculación cincovillesa a traviés d'a suya familia eixeyana y d'as amistaz que teneba en Taust entre os ricos propietarios d'a villa.
Con a familia Castellano d'Exeya yera propietario en Zaragoza d'a banca Villarroya y Castellano, establita dende primerías d'o sieglo XIX, y que estió la base d'o posterior Banco Zaragozano. Tamién yera propietario d'o Diario de Zaragoza, o portavoz d'as ideyas conservadoras en Zaragoza y cabecera degana d'a prensa d'Aragón.
Cuan lo nombroron ministro d'Ultramar, fació cuantos nombramientos de cargos publicos en as colonias d'Espanya entre os suyos familiars y amigos. Por a suya chestión en temas economicos colonials, lo nombroron en 1903-1904 gubernador d'o Banco d'Espanya, convertindo-se posteriorment en ministro d'Hicienda.
En a suya faceta como empresario, estió tamién muit vinculau a la construcción d'entibos en Aragón, estando president d'a chunta de l'entibo d'a Penya, de l'entibo de Mezalocha y de l'entibo de Sant Bertolomeu, iste zaguer en o río Arba de Luesia en o termin d'Exeya d'os Caballers.
Vinclos externos Tomás Castellano Villarroya en a Gran Enciclopedia Aragonesa.
Categoría:Empresarios d'Aragón Categoría:Ministros d'o Gubierno d'Espanya naixius d'Aragón Categoría:Muertos en Madrit Categoría:Naixius de Zaragoza Categoría:1850 (naixencias) Categoría:1906 (muertes)