Os sufixos cultos en aragonés perteneixen sobre tot a palabras d'o rechistro culto d'a luenga y se troban en cultismos, semicultismos, tecnicismos y o lexico especializau de diferents disciplinas: ciencia, relichión, administración, dreito, etcetera. As palabras que presentan estos sufixos se troban con regularidat en a "scripta aragonesa" u estándard escrito de l'aragonés medieval, por estar una d'as luenga oficials d'o Reino d'Aragón y fer-se servir en tota clase de textos escritos.
En a mes gran part d'os casos as palabras con sufixos cultos son adaptacions d'as palabras latinas con estos sufixos y pareixitas a las palabras equivalents de totas as luengas romances, bi ha pocos casos de palabras con estos sufixos que s'haigan feito por derivación dreitament dende una palabra patrimonial (con fonetica aragonesa) u amprada (arabismos, etcetera), usual en fase romanz. Un d'os pocos eixemplos que se remontan a la fase romanz ye mesquindat, palabra feita partindo d'un arabismo.
En l'aragonés posterior a lo sieglo XVI esta clase de palabras s'han iu fendo menos comuns, por actuar o castellano de luenga oficial y de cultura. D'esta manera os termins cultos castellanos con esta clase de sufixos han iu substituyindo os termins cultos aragoneses, a vegadas d'una forma purament fonetica, como por eixemplo a terminación -eo ha substituyiu en muitos casos a la terminación aragonesa -eu. En l'actualidat l'Academia de l'Aragonés ha fixau criterios sobre a ortografía de beluns d'estos sufixos.
Lista de sufixos cultos en aragonés Son sufixos cultos en aragonés: Sufixo -ancia. Sufixo -anio. Sufixo -ario. Sufixo -ción. Sufixo -dat. Sufixo -elo. Sufixo -encia. Sufixo -endo, con la variant -iendo. Sufixo -eu. Sufixo -ico. Sufixo -ido. Sufixo -io. Sufixo -isa. Sufixo -ivo (tamién se troba en palabras patrimonials). Sufixo -lochía. Sufixo -ment(o). Sufixo -torio. Sufixo -tut. Sufixo -ulo.
Referencias
Bibliografía David A. Pharies: Diccionario Etimológico de Los Sufijos Españoles: Y de Otros Elementos Finales Volumen 25 de Biblioteca románica hispánica. Editorial Gredos, S.A., 2002.
Categoría:Sufixos cultos en aragonés