O glaciar de Petita Vinhamala (en francés glacier du Petit-Vignemale) ye un glaciar d'os Pireneus situau en o macizo de Camachibosa, en a versant norte d'a muga entre Aragón y Francia en o departamento d'os Altos Pireneus y en a rechión d'Occitania.
Iste glaciar yera o zaguero d'os Pireneus en poseyer una cascada de seracs, antis que no desapareixese en 2007.
Cheografía Dende a ruptura d'a cascada de seracs en 2007, o glaciar ye deseparau en dos: a parti superior d'o glaciar, exposada a o norte, se troba en un corredor zarrau por a Petita Vinhamala y a punta Chausenque. a parti inferior ye exposada a o nord-ueste y se troba a o piet d'o corredor, dende a forqueta d'Osso en dirección ta o glaciar deras Oletas de Gauba.
As auguas d'o suyo deschele alimentan a gave de Gauba.
Historia En rematar a chicota Edat de Chelo arredol de l'anyo 1850, o glaciar de Petita Vinhamala yera fisicament uniu a o glaciar deras Oletas de Gauba. Se nombraba ta par d'alavez a iste aparato unico como "glaciar Norte d'a Camachibosa". Iste zaguero s'estendillaba por una superficie de 0,60 km² y teneba o frent mas baixo d'os Pireneus a 2.190 metros.
Os dos glaciars s'han deseparau tiempo dimpués, estando a suya ruptura definitiva en primerías d'os anyos 1930.
Encara que se deseparó d'o suyo vecín, o glaciar de Petita Vinhamala continó alimentando-lo a traviés de frecuents cayidas de seracs dica primerías d'os anyos 1980; o glaciar poseyeba alavez una superficie de 0,12 km². Manimenos, debiu a las insuficients acumulacions de nieu, a cascada de seracs que constituyiba una d'as choyas d'os Pireneus se remató de crebar totalment en 2007.
A parti inferior, que permaneixe deseparada d'a resta d'o glaciar, ye en situación de gran vulnerabilidat.
En 2020, as dos zonas de chelo no representaban mas de 0,05 km².
Se veiga tamién Glaciars d'os Pireneus
Vinclos externos Asociación Pirenenca de Glaciolochía Os glaciars pirenencos
Petita Vinhamala Petita Vinhamala Categoría:Macizo de Camachibosa Categoría:Parque Nacional d'os Pireneus