A Venus adormida, tamién conoixida como a Venus de Dresden, ye un cuadro de l'artista veneciano renaixentista Giorgione, feita ta par de 1501, y que influyiría muito en pinturas posteriors. Hue se troba exposada en a Gemäldegalerie Alte Meister (Galería de Pinturas de Viellos Mayestros) de Dresde (Alemanya).
En a pintura, que ye una d'as zagueras obras de Giorgione, se vei una muller despullada con un perfil que pareix seguir o d'os tozals d'o fondo. O pintor treballó con gran detalle l'horizont y as suyas uembras. A textura d'as telas, a on que chace placidament a diosa y l'armonioso y bucolico paisache, atorga a este cuadro un chusto equilibrio entre calma y sensualidat. En esleír de pintar una muller despullada, Giorgione marcaba una revolución en a historia de l'arte; actualment ye considerau per bels criticos un d'os iniciadors de l'arte moderno.
A la suya muerte, a pintura no yera encara rematada. O cielo lo remataría mes tarde Ticiano (Ticiano tamién pintaría dispués una altra Venus, encara que no produciría es mismos efectos que a de Giorgione).
En a obra i subchacen cualques implicacions eroticas en o brazo devantau de Venus y en a colocación d'a man ezquierda en a forcacha. As telas son pintadas de plata, una color freda que contrasta con as tonalidaz mes calients usadas ta los lins, y pareixen richidas, a diferencia d'os de pinturas similars feitas per Ticiano u Velázquez. O paisache imita las curvas d'o cuerpo d'a muller, cosa que ye relacionada con o feito de tornar a figura humana enta la concepción d'obchecto organico y natural.
L'actitut contemplativa enta la natura y a belleza d'a figura son caracteristicas tipicas de Giorgione. A composición d'esta pintura influyó clarament en Ticiano, y mes tarde en pintors como Ingres u Rubens.
Vinclos externos
Categoría:Cuadros d'Italia Categoría:Cuadros d'o Renaiximiento Categoría:Cuadros de 1501 Categoría:Obras de Giorgione