A ilesia de Sant Francisco Chabier de Chúnez ye una ilesia que se troba en Chúnez (Cinco Villas, Aragón). Perteneixe a l'arcipestrau d'Erla-Uncastiello, en a diocesi de Chaca.
Historia Actualment en ruenas, fue probablement construyida en o sieglo XVII. En 1955 encara conservaba a suya cubierta en buen estau, estando en l'anyo 1962 celebrada a zaguera misa. Entre as dos zagueras decadas d'o sieglo XX y as dos primeras d'o XXI s'ha rematau d'escanyuflar, quedando nomás que as enruenas.
Descripción Tien planta rectangular y una sola nau no guaire gran (de 75 m² de superficie) que sigue a dirección Este-Ueste. D'antis mas yera cubierta por una vuelta encamonada que actualment ha desapareixiu. A cubierta yera a dos auguas con un caballet paralelo a la linia d'a frontera y alero con una ringlera de tellas cobeixas.
Fueras de bella zona como esquinas y marcos de vanos, a on i hai piezas treballadas, os suyos muros son feitos de piedra picada. En a frontera destacaba nomás a suya dentrada en arco de meyo punto y adovelas, con una finestreta dencima. I hai tamién en a dentrada unas gradas de dica cuatre livels d'altaria feitas de losas gruesas. Teneba tamién una chicota espadanya en o suyo costau sud que habió d'espaldar-se arredol de l'anyo 2020 y en a que i yera una unica campana.
En l'interior encara se conserva una pila baptismal enronada y unatra mas chicota pa l'augua bendita en una paret lateral. Tamién i hai restas de l'altar mayor, que dica meyaus d'o sieglo XX yera presidiu por un lienzo de sant Francisco Chabier datau en o sieglo XVII. En a dentrada d'a ilesia habió d'haber bel tipo de marco ornamentau que ha estau espoliau.
Vinclos externos En a pachina d'o SIPCA Ficha en gcatholic.org
Francisco Chabier de Chunez Francisco Chabier de Chunez Francisco Chabier de Chunez Chunez Francisco Chabier de Chunez Categoría:Molimentos de Chúnez