O cardo con almendras u cardo a l'aragonesa ye una receta de cocina propia d'as gastronomías d'Aragón, Navarra y La Rioja en a que l'ingredient prencipal son os cardos, cocinaus con una salsa que se composa d'almendras y acompanyaus de nata agra.

Ye una receta a on los suyos ingredients se troban presents en o territorio d'Aragón dende muit antigament y que fácil que se conoixese ya en epoca de l'Imperio Romano, y que hue en día ye una d'as recetas tradicionals asociadas a las fiestas de Navidat. María José: Cardo en salsa de almendras: la receta de verduras típica de la Navidad aragonesa, en a web Directo al paladar.

Ye un plato que se sirve calient, y gosa servir-se a la mesa con nata agra y acompanyau de birostas de pernil, preferentment de pernil de Teruel.

Preparación En primeras, cal limpiar bien os cardos, cortando-los dimpués en escais, d'alto u baixo 2 cm de longaria, y fendo-ne la suya cocción en augua con o suco d'o limón alto u baixo 10 u 12 minutos dica que estén bien cocius, reservando-los en a suya propia augua de cocción.

D'atra man, en un cazuel con una mica d'aceite d'oliva se fríe una ascla d'allo y una mica de preixil, bien trastallau, adhibindo-ne dimpués una cullarada de farina y bels 250 ml de caldo, dica que la salsa quede bien ligada. S'escola lo caldo de cocción d'os cardos y se lis adhibe ista salsa, deixando cocer uns minutos (cal retirar lo caldo de cocción d'os cardos por a suya amargor).

En un almidet se carracan as almendras (previament torradas) con una mica d'augua dica que quede una mena de pasta, que se disuelve con una mica d'a salsa d'os cardos y se conchira bien con istos, s'adhibe sal y pebre y se deixa cocer bels 10 minutos mas, servindo-se, como s'ha dito, con nata agra (que sirve tamién ta contrarrestar l'amargor d'o cardo) y birostas de pernil (que amás d'aportar una mica de proteína milloran o sabor d'o plato).

Referencias

Vinclos externos Cardo con almendras, por Karlos Arguiñano, en YouTube. Cardos con almendras, cocina tradicional navarra, en YouTube. Un clásico de Navidad, cardo en salsa de almendras, en YouTube.

Categoría:Platos d'Aragón Categoría:Platos de La Rioja Categoría:Platos de Navarra Categoría:Gastronomía nadalenca