A chudería de Tarazona ye un barrio d'a ciudat de Tarazona dividiu en dos sectors: a chudería viella, nuclio orichinal situau a os piez d'a zuda, y a chudería nueva, expansión baixomedieval.
Descripción Se divide en dos sectors, conoixius como chudería Viella y chudería Nueva y deseparaus por a cequia de Selcos. A chudería Viella ye situada a os piez d'a Zuda, ocupando as actuals carreras Aires, Judería, Rúa Alta, Rúa Baja y plaza de los Arcedianos. I heba puertas en as suyas carreras prencipals. As famosas casas penchadas yeran en a muga d'a chudería, pero no se trobaban adintro d'ista, sino que yeran ocupadas por a baixa nobleza y linaches como os López de Gurrea.
O prencipal material constructivo yera o ladriello, rebozau con calsina u azulet. L'amplaria minima d'as carreras y callizos yera de cuatre coudos d'amplaria. L'actual Rúa Alta sería probablement a carrera Mayor d'a chudería u carrera d'a Sinoga a on se concentraban as viviendas d'os miembros d'a elite d'a comunidat como rabins, mercaders, orfebres y medicos. I heba un aria comercial entre o zaguer trampo d'a carrera Judería y a plazuela de la Mata. En a plaza de los Arcedianos, que teneba mayor grandaria por ixas envueltas, yeran a on se celebraba o sukkot, acto que representaba a salida d'os chudieus d'Echipto.
A chudería Nueva se trobaba arredol de l'actual plaza de Santa María. Contaba con una puerta en o zaguer trampo d'a carrera Madorrán y yera un puesto habitual de celebracions. O fosar se trobaba entre a carrera Caldenoguea y o camín de Mataperros.
Historia Se creye que i habió presencia de sefarditas dende epoca visigoda y talment mesmo dende os zaguers tiempos d'a ciudat romana de Turiaso. Manimenos como en atras ciudaz d'Aragón a documentación sobre a comunidat chudieva en Tarazona creixe con a conquiesta d'a ciudat por parti d'Alifonso I en 1119. Por ixas envueltas o rei concede a o bispe dreitos sobre os impuestos de l'alchama, que estió una d'as mas importants d'Aragón.
O sieglo XIII estió a epoca dorada d'a chudería de Tarazona, estando a familia Portella, y mas que mas entre 1273 y 1286 cuan Moshé de Portella yera baile reyal, una d'as mas prosperas gracias a o suyo dominio d'o comercio de cerials en a redolada.
O declín d'a comunidat chudieva prencipia en o sieglo XIV, primero con a peste negra de 1348 y os rebrotes de 1362 y 1369 y dimpués con a guerra d'os Dos Peros que destruyió cuantas vegadas parti d'o barrio chudieu, que no yera protechiu por a muralla. En ixe sieglo ye manimenos cuan, dimpués d'as reconstruccions, a chudería plega a la suya maxima extensión. As primeras referencias a la chudería nueva son de l'anyo 1440, reinando Alifonso V, qui aplicó exempcions fiscals a os chudieus pa mirar de dinamizar a economía aragonesa.
A historia d'a comunidat sefardita en Tarazona remata con a implantación d'un tribunal d'a Inquisición en a ciudat en l'anyo 1484 y a posterior expulsión d'os chudieus d'a Corona d'Aragón en 1492, marchando muitos enta o reino de Navarra u ta atros países d'a Mediterrania a traviés d'os puertos de Barcelona y Tortosa. Se creye manimenos que alto u baixo a metat d'a comunidat se convertió a o cristianismo, encara que muitos d'istos conversos habrán d'enfrontinar-se durant parti d'o sieglo XVI a persecucions.
Imáchens
Bibliografía Guía de las juderías de Aragón. Un apasionante recorrido por el Aragón judío. Miguel Ángel Motis Dolader. Guías Turísticas Prames.
Vinclos externos
Caminos de Sefarad. Tarazona Rutas por las juderías de España. Tarazona. Caminos de Sefarad. Guía de la judería de Tarazona. Miguel Ángel Motis. Gubierno d'Aragón Barrio de la Judería. Tarazona Monumental.
Tarazona Categoría:Historia de Tarazona