A chudería de Daroca estió l'antigo barrio chudieu d'a ciudat de Daroca.
Descripción A chudería de Daroca tien una clara inspiración islamica, con callizos de cuatre coudos d'amplaria, que guarenciaban intimidat, ixoreyo y luz solar, y carreras de siet coudos d'amplaria, que permitiban o paso de carros. En o periodo islamico o barrio chudieu ocupaba o espacio situau entre o castiello Mayor y o barranco de la Grajera, chunto a la puerta Alta, estendillando-se entre os sieglos XIII y XIV enta l'atro costau d'a carrera Mayor, estando por ixas envueltas a suya mayor grandaria.
A carrera Barrio Nuevo yera a carrera mayor d'a chudería y chunto con l'actual carrera Josef Albo yeran as dos vías prencipals d'o barrio a on viviba a elite intelectual y economica. Os chudieus con menos recursos ocupaban a redolada d'as carreras Hiladores y Escalerillas. Atros viviban en esplugas, habilitadas como viviendas u bordicallos, en as laderas d'o castiello. De trazau zigzaguiant, en documentos medievals apareixen nombres de carrerons como la "callexa clamada de la judería y la callexa del poço de Sant Pero".
As casas teneban por un regular dos altarias, amás d'una bodega a on s'alzaba o vin kosher. A la planta baixa se dentraba a traviés d'un porche u siestro y se i trobaban distintas estancias y corrals pa os animals. En a parte superior yeran as cambras y a cocina con o fogar. Os prencipals materials constructivos yeran o ladriello y l'adoba (en as casas mas pobres), asinas como o cheso pa guarnir parez y soleros y a fusta pa bigas y pilars.
O fosar, conoixiu en a epoca como fossar de los jodios, pareixe que se trobaba en as laderas d'o cerro de Sant Chorche, encara que no s'ha puesto trobar.
Dica a plegada d'a Inquisición a relación entre chudieus y conversos yera prou buena, ya que teneban importants vinclos familiars y d'amistanza. En prencipiar a epoca de Pascua os chudieus les daban pan cotaço, arrucaques y turrados, mientres que en rematar-ne istos recibiban pan, ensaladas y naranchas.
Historia Apareixe documentau que Remón Berenguer IV respectó a ubicación d'a chudería dimpués d'a concesión d'o fuero de Daroca en 1142. Seguntes o fogache de 1398 a ciudat teneba por ixas envueltas 27 casatas, lo que significaba una población d'entre 110 y 120 chudieus. En o primer tercio d'o sieglo XV a población heba puyau dica os 3.200 habitadors. En tiempos de Ferrando I os fogars chudieus yeran 40, lo que representaba un 5% d'a población d'a ciudat. Entre os suyos vecins mas ilustres se trobaban Chusé Albo, filosofo y líder espritual naixiu arredol de 1380 y Loís de Santánchel, mestre racional de Ferrando o Catolico.
A sinoga de Daroca se nombra por primera vegada en 1279. Entre 1382 y 1387 s'enampló, adhibiendo-ie un chicot edificio annexo en un d'os suyos laterals que se feba servir como residencia d'o rabín u con fins asistencials. L'edificio se describe asinas en un texto en aragonés d'as comunidaz aragonesas:
Pareixe que ista sinoga fue consagrada en l'anyo 1416 como ilesia de Santa Engracia, encara que no i hai constancia de que se i fesen oficios sagraus. En a segunda metat d'o sieglo XV se charra ya d'a sinogua nueva, que se construyió arredol de l'anyo 1459. En a decada de 1480 s'esvielló. Dimpués d'a expulsión d'os chudieus fue vendida por o baile reyal a o mercader local Juan Jaso por un pre de 400 sueldos.
Cuan fuoron forachitaus, salioron entre 55 y 140 chudieus darocenses por o puerto de Murviedro que s'unioron astí en un barco a atros procedents d'as chuderías d'Epila, Fariza y Albarracín. Atros muitos s'estimoron mas de convertir-se u marchar-ne enta Tudela.
Imáchens
Bibliografía Guía de las juderías de Aragón. Un apasionante recorrido por el Aragón judío. Miguel Ángel Motis Dolader. Guías Turísticas Prames.
Vinclos externos
Judería de Daroca. Turismo de Aragón. Judería de Daroca. Camino del Cid. Judería de Daroca. eSefarad.
Daroca Categoría:Historia de Daroca