Samianigo Baixo u tamién dito O Puent de Samianigo (en castellano Sabiñánigo Bajo u El Puente de Sabiñánigo) ye un barrio de Samianigo; d'antis mas yera un lugar desapartau, pero ha estau absorbiu por a capital de l'Alto Galligo. Situau en a marguin ezquierda d'o Galligo.
Teneba 24 fuegos y 148 habitants a meyaus d'o sieglo XIX y encara yeran 83 os habitants en 1981.
L'edificio mas destacau d'o barrio ye l'antiga casa Batanero, que hue ye o Museu d'Artes Populars de Sarrablo, una d'as mas interesants muestras d'arquitectura popular sarrablesa. Construyida en a primera metat d'o sieglo XIX, destacan a suya chaminera tronconica con o tipico espantabroixas, os suyos balcons de fierro y fusta, as suyas finestras decoradas, o furno y o fogar.
Tamién ye interesant casa Lasaosa, con a portalada conopial suya con a calendata de 1611, atra portalada adintelada con una cruz gravada en baixorrelieu y o suyo tradicional balcón de fusta. Puet veyer-se tamién o Mesón Quemao a l'atro canto d'o río con a suya chaminera tronconica, a decoración con calso y bellas finestras interesants.
Categoría:Lugars de Samianigo Categoría:Lugars d'a provincia de Uesca Categoría:Localidaz d'a diocesi de Chaca en l'Alto Galligo