Dar es Salaam (en arabe دار السلام ; antigament Mzizima) ye una ciudat de Tanzania, que ye a mayor ciudat d'o país, o suyo principal centro economico y a suya antiga capital (hue a capital ye Dodoma, dende 1973).
A suya población ye de 2.456.100 habitants (2005) en una superficie de 162,50 km², con una densidat de población de 15.114,46 hab/km².
Dar es Salaam ye a l'este d'o país, a o canto de l'Oceano Indico, y a mayor parte d'os suyos habitants son de relichión islamica.
Historia O primer europeu en plegar ta a ciudat estió l'alemán Albert Roscher, plegato en 1859 dende Hamburgo.
En 1866 o soldán de Zanzíbar Seyyid Madjid cambió o nombre d'a ciudat ta l'actual, que significa a casa d'a paz. Dimpués d'a suya muerte en 1870 a ciudat esmorteció, dica a plegata d'a Companyía Alemana de l'Africa Oriental, que bi establió una factoría. A ciudat se convertió en a capital d'a colonia de l'Africa Oriental Alemana.
Mientres a Primera Guerra Mundial, os Aliaus conquerioron l'Africa Oriental Alemana, que se convertió dimpués d'a guerra en a colonia britanica de Tanganyika, y Dar es Salaam continó estando a capital d'a colonia.
En 1961 o Reino Uniu concedió a independencia a Tanganyika, y en 1964 iste país s'unificó con Zanzíbar ta formar a clamata Tanzania. Mientres istos cambios, Dar es Salaam continó como capital, dica 1973, en que a capital administrativa se tresladó ta Dodoma, en l'interior d'o país.
Vinclos externos
Bolsa de Dar es Salaam. Universidat da Dar es Salaam.
Categoría:Localidaz de Tanzania Categoría:Localidaz portuarias de Tanzania