Cementos Tudela Veguín ye una empresa asturiana propiedá de la Corporación Masaveu fundada en 1898 en Veguín, Uviéu. Foi la primer fábrica de cementu d'España.
L'impulsor y primer presidente de la compañía foi Elías Masaveu Rivell, sobrín de Pedro Masaveu, col qu'entamó a trabayar na tienda qu'esti tenía na cai Cimavilla n'Uviéu. Aprovechando les obres que diben facese nel puertu d'El Musel en Xixón pareció-y bona idea el facer una planta de cementu n'Asturies, pa poder vende-y tol material que-yos ficiera falta.
Col tiempu la Casa Masaveu foi participando n'empreses mineres como Carboneras de Valdecuna y Hulleras de Seguín y Olloniego, pa poder aforrar en costes.
En 1953 inauguróse una nueva fábrica n'Aboño aprovechando les canteres de la zona y la cercanía del puertu del Musel pa poder sacar el cementu.
Pa poder tresportar el cementu per mar la empresa foi encargando la construcción de dellos buques a lo llargo de los años. Los primeros fueron el Cementador y el Fraguador y más tarde l'Encofrador y Cementos del Cantábrico.
Referencies
Enllaces esternos
Categoría:Empreses d'Asturies Categoría:Uviéu Categoría:Corporación Masaveu