Nataša Pirc Musar , ye una abogada, escritora, periodista y política eslovena, actual presidenta de la República de Eslovenia dende avientu de 2022.
Ye la primera muyer n'ocupar el cargu.
Biografía Nataša Pirc estudió derechu na Facultá de Derechu de la Universidá de Llubliana en 1992. En 1997, aprobó l'exame d'abogacía y depués consiguió un trabayu en Radiu y Televisión d'Eslovenia ("Radio Televizija Slovenije"), onde trabayó mientres seis años como periodista y presentadora del programa central de noticies. Depués, mientres cinco años, foi la presentadora del programa central de noticies "24UR" na televisión comercial "POP TV".
Nataša Pirc completó un entrenamientu adicional en CNN n'Atlanta. Depués siguió los sos estudios mientres dos semestres na Universidá de Salford en Manchester, mientres los cuales realizó práctiques na BBC, Granada TV, Sky News, Reuters TV y Border TV. Llogró un doctoráu na Facultá de Derechu de la Universidá de Viena con una disertación sobro un equilibriu xustu ente los derechos de privacidá y la llibertá d'información. En 2001, convirtióse en directora del departamentu de comunicación corporativa d'"Aktiva Group", onde trabayaba el so maríu Aleš Musar.
N'abril de 2003, incorporóse al Tribunal Supremu d'Eslovenia como directora del Centru d'Educación ya Información. Dende marzu de 2011 foi vicepresidenta de l'Autoridá Común de Control d'Europol, y dende 2012 hasta el final del so mandatu como comisaria d'información, foi presidenta d'esti organismu de la Xunión Europea. Pirc Musar tamién foi comisionada d'accesu a la información pública ente 2004 y 2014. En rematando el so mandatu como comisaria d'información, fundó'l so propiu bufete d'abogaos. Ente otros, mientres la presidencia de Donald Trump, representó a la esposa de Trump, Melania Trump, y al so padre, Viktor Knavs.
Ente 2010 y 2021, Nataša Pirc Musar foi votada delles vegaes ente los diez abogaos más influyentes del país. Cofundó l'asociación "OnaVe" pa conectar a muyeres espertes y promover el conocencia. En 2015-2016, foi presidenta de la Cruz Roxa Eslovena.
Pirc Musar ye autor o coautor de siquier seis llibros sobro llibertá d'información y privacidá n'eslovenu, inglés y croata.
El 23 de xunu de 2022 anunció la so candidatura a la presidencia d'Eslovenia nes próximes elecciones presidenciales eslovenes de 2022, previstes pal 23 d'ochobre de 2022, como candidata independiente. La so candidatura foi sofitada polos expresidentes d'Eslovenia Milan Kučan y Danilo Türk.
A partir d'agostu de 2022, Pirc Musar y Anže Logar lideraron les encuestes, pasaron a una segunda vuelta programada el 13 de payares onde Pirc Musar ganó a Logar y convirtióse en presidenta electa.
Bibliografía
Referencies
Enllaces esternos
Categoría:Presidentes d'Eslovenia Categoría:Periodistes d'Europa Categoría:Persones de Liubliana Categoría:Xuristes d'Europa