La clonación humana ye la creación d'una copia xenéticamente mui asemeyada d'un ser humanu, una célula humana o un embrión humanu mediante téuniques de clonación. Nel contestu de la reproducción, el términu refierse principalmente a la producción d'un embrión utilizando'l material xenético nuclear d'una célula somática d'otra persona, normalmente mediante tresferencia nuclear de célules somátiques (TNCS). Esta téunica ye distinta de la fecundación, porque nun implica la combinación del material xenético nuclear d'un ovocitu y un espermatozoide.

La clonación humana suel estremase en dos finalidaes principales: la clonación reproductiva, que tendría como oxetivu'l nacimientu d'una persona, y la denominada clonación terapéutica o clonación con fines d'investigación, na que se produz un embrión mediante tresferencia nuclear pa obtener célules madre embrionaries ensin intención d'implantalu nun úteru.

La clonación reproductiva humana nun se consiguió de manera científicamente verificada. Hubo dellos anuncios de supuestos nacimientos de persones clonaes, especialmente a principios del sieglu XXI, pero nun se presentaron pruebes independientes que demostraren nengún d'ellos. En cambéu, la creación de blastocistos humanos mediante tresferencia nuclear y la derivación de célules madre embrionaries a partir d'ellos sí se consiguió experimentalmente.

Téunica

La téunica más rellacionada cola clonación reproductiva y terapéutica ye la tresferencia nuclear de célules somátiques. El procesu entama cola obtención d'un ovocitu, al que se-y retira'l nucleu celular y, poro, la mayor parte del so material xenético. Depués introdúzse nel ovocitu'l nucleu procedente d'una célula somática del individuu que se quier clonar. La célula reconstruyida actívase pa que principie a dividise y pueda desenvolvese hasta formar un blastocistu.

Na clonación reproductiva hipotética, esti embrión tendría d'implantase nun úteru y completar la xestación. Na clonación terapéutica, sicasí, el desenvolvimientu detiénse in vitro y les célules de la masa celular interna del blastocistu pueden utilizase pa producir una llinia de célules madre embrionaries.

El resultáu nun sería una copia absoluta de la persona donante. El clon tendría esencialmente'l mesmu ADN nuclear, pero'l ADN mitocondrial procedería principalmente del ovocitu receptor. Amás, factores epixenéticos, ambientales y del desenvolvimientu produciríen diferencies físiques y biolóxiques ente dambos individuos. Pol mesmu motivu, un clon nun heredaría los recuerdos, la personalidá nin les esperiencies de la persona de la que procediera'l nucleu.

Historia

Antecedentes

Los primeros esperimentos de tresferencia nuclear realizáronse durante'l sieglu XX con anfibios. Estes investigaciones demostraron progresivamente que'l nucleu de célules diferenciaes podía conservar la información xenética necesaria pa dirixir el desenvolvimientu d'un organismu.

L'avance decisivu nel campu de la clonación de mamíferos producióse en 1996 col nacimientu de Dolly, una oveya creada nel Institutu Roslin d'Escocia mediante la tresferencia del nucleu d'una célula somática adulta a un ovocitu enucleáu. Dolly foi'l primer mamíferu clonáu a partir d'una célula somática adulta.

El nacimientu de Dolly demostró que'l material xenético d'una célula adulta diferenciada podía reprogramase hasta permitir el desenvolvimientu d'un organismu completu y abrió un debate internacional sobre la posibilidá d'aplicar procedimientos asemeyaos a seres humanos.

En 1997, la UNESCO aprobó la Declaración Universal sobre'l Xenoma Humanu y los Derechos Humanos, que señala nel so artículu 11 que nun tienen de permitise práctiques contraries a la dignidá humana, como la clonación con fines de reproducción de seres humanos.

Primeros esperimentos con embriones humanos

En 2001, investigadores de la empresa d'Estaos Xuníos Advanced Cell Technology anunciaron la producción d'embriones humanos mediante tresferencia nuclear con fines d'investigación. Los embriones consiguieron realizar unes poques divisiones celulares, pero nun llegaron a producir llinies de célules madre.

En 2002, la empresa Clonaid, rellacionada col raelismu, anunció'l nacimientu d'una neña supuestamente clonada llamada «Eve». L'organización afirmó posteriormente que nacieren otros clones humanos, pero nun presentó pruebes xenétiques independientes que permitieren comprobar les afirmaciones, polo que los anuncios nun fueron aceptaos pola comunidá científica.

Casu de Hwang Woo-suk

En 2004, un equipu encabezáu pol investigador surcoreanu Hwang Woo-suk publicó en Science un estudiu nel que afirmaba haber obtenío una llinia de célules madre embrionaries a partir d'un blastocistu humanu producíu mediante tresferencia nuclear. En 2005, el mesmu equipu afirmó haber producío once llinies personalizaes de célules madre a partir de célules de distintos pacientes.

Investigaciones posteriores demostraron que los resultaos principales d'estos trabayos taben fabricaos. Los artículos fueron retiraos por Science en 2006. El casu convirtióse nunu de los principales escándalos de fraude científicu nel campu de les célules madre.

Célules madre mediante tresferencia nuclear

En 2013, un equipu encabezáu por Shoukhrat Mitalipov consiguió la primer derivación confirmada de llinies de célules madre embrionaries humanes a partir de blastocistos creaos mediante tresferencia nuclear de célules somátiques. Les célules presentaben pluripotencia y el so xenoma nuclear procedía de les célules somátiques utilizaes como donantes.

En 2014, otros investigadores consiguieron producir célules madre embrionaries mediante TNCS emplegando núcleos procedentes de célules somátiques de persones adultes, demostrando que la reprogramación nuclear podía realizase tamién con esti tipu de célules.

Estos avances demostraron la posibilidá de realizar tresferencia nuclear con célules humanes y obtener célules madre, pero nun supunxeron la clonación reproductiva d'un ser humanu.

Clonación reproductiva

La clonación reproductiva humana tendría como oxetivu producir'l nacimientu d'un individuu utilizando un embrión creáu por tresferencia nuclear. Tres la producción del embrión, esti tendría d'implantase nel úteru d'una persona xestante de manera asemeyada a un embrión producíu mediante fecundación in vitro.

Nun hai constancia científicamente verificada del nacimientu de nenguna persona mediante esti procedimientu. Los esperimentos realizaos con otros mamíferos demostraron históricamente una eficiencia baxa y una elevada proporción de fallos nel desenvolvimientu embrionariu, embarazos perdíos y alteraciones del desenvolvimientu.

La International Society for Stem Cell Research (ISSCR) inclúi la implantación n'úteros humanos o animales d'embriones humanos producíos mediante reprogramación nuclear ente les actividaes que nun tienen de realizase.

Clonación terapéutica

La clonación terapéutica, tamién denominada tresferencia nuclear con fines d'investigación, utiliza una parte inicial del mesmu procedimientu que la clonación reproductiva, pero'l so oxetivu nun ye producir un nacimientu. El blastocistu obteníu utilízase pa derivar célules madre embrionaries que puedan multiplicase y diferenciase en distintos tipos celulares.

Una de les ventayes potenciales d'esta téunica ye la posibilidá de producir célules col mesmu xenoma nuclear que'l paciente del que proceda la célula somática. Estes célules pueden utilizase na investigación de enfermedaes, nel estudiu de mecanismos celulares y, potencialmente, na medicina rexenerativa.

La téunica presenta sicasí diverses dificultaes. La tresferencia nuclear precisa ovocitos humanos, tien una eficiencia limitada y la creación y utilización d'embriones humanos plantea cuestiones étiques. Amás, el desenvolvimientu de les célules madre pluripotentes inducíes (iPS), obteníes mediante la reprogramación de célules adultes ensin necesidá de producir un embrión por tresferencia nuclear, proporcionó una alternativa pa munches aplicaciones d'investigación.

Diferencies ente un clon y la persona donante

Un ser humanu producíu mediante tresferencia nuclear nun sería una copia idéntica de la persona de la que procediera la célula somática. Compartiría con ella prácticamente'l mesmu xenoma nuclear, nuna situación comparable dende'l puntu de vista xenéticu a la de xemelos idénticos nacíos en momentos diferentes.

Sicasí, el citoplasma y les mitocondries procederíen principalmente del ovocitu utilizáu na tresferencia nuclear, polo que'l clon podría tener un ADN mitocondrial diferente. Los procesos epixenéticos que regulen la espresión de los genes tampoco tienen por qué reproducise exactamente.

Amás, el desarrollu embrionariu, l'ambiente uterín, la alimentación, les enfermedaes, les esperiencies y el contestu social inflúin sobre les característiques d'un individuu. La clonación nun permitiría, poro, reproducir los recuerdos, la personalidá, la intelixencia o'l comportamientu d'una persona.

Cuestiones étiques

La clonación humana ye oxetu d'un ampliu debate bioéticu. Na clonación reproductiva, una de les principales objeciones ye'l riesgu pa la persona xestante y pal posible individuu nacíu, pola elevada frecuencia de fallos observada históricamente na clonación de mamíferos.

Tamién se discutieron cuestiones rellacionaes cola identidá y autonomía de la persona clonada, la selección de les persones que podríen ser clonaes, la posibilidá d'usos euxenésicos, la comercialización de la reproducción y les posibles desigualdaes nel accesu a estes teunoloxíes.

La clonación con fines d'investigación plantea cuestiones parcialmente distintes, especialmente sobre l'estatutu moral y xurídicu del embrión humanu, la creación d'embriones con fines científicos y la obtención d'ovocitos.

Regulación

Ámbitu internacional

La Declaración Universal sobre'l Xenoma Humanu y los Derechos Humanos, aprobada pola UNESCO en 1997, establez nel so artículu 11 que nun tienen de permitise práctiques contraries a la dignidá humana, citando específicamente la clonación con fines de reproducción de seres humanos.

Nel marcu del Conseyu d'Europa, el Protocolu adicional al Conveniu pa la protección de los derechos humanos y la dignidá del ser humanu con respectu a les aplicaciones de la bioloxía y la medicina sobre la prohibición de clonar seres humanos abrióse a firma'l 12 de xineru de 1998 y entró a valir el 1 de marzu de 2001. El protocolu prohíbe cualquier intervención destinada a crear un ser humanu xenéticamente idénticu a otru ser humanu, vivu o muertu.

En 2005, l'Asamblea Xeneral de les Naciones Xuníes aprobó la Declaración de les Naciones Xuníes sobre la Clonación Humana, resolución 59/280. La declaración pidió a los Estaos miembros adoptar les midíes necesaries pa prohibir formes de clonación humana incompatibles cola dignidá humana y la protección de la vida humana.

España

N'España, la Llei 14/2006, de 26 de mayu, sobre téuniques de reproducción humana asistida establez nel artículu 1.3 la prohibición de la clonación en seres humanos con fines reproductivos.

La Llei 14/2007, de 3 de xunetu, d'Investigación biomédica regula la investigación con ovocitos, preembriones, célules y texíos d'orixe embrionariu humanu. La llei permite, baxo determinaes condiciones y controles, la utilización de téuniques de tresferencia nuclear con fines terapéuticos o d'investigación, pero non la creación d'un ser humanu clonáu con fines reproductivos.

Na cultura popular

La clonación humana ye un tema recurrente de la ciencia ficción dende antes de la creación de Dolly. La lliteratura, el cine, la televisión y los videoxuegos representaron clones humanos como copies de persones, exércitos, sustitutos d'individuos muertos o fontes d'órganos.

Delles d'estes representaciones difieren considerablemente de la clonación biolóxica real, especialmente cuando atribúin al clon los recuerdos, la personalidá o la edá del individuu orixinal.

Ver tamién

Clonación Clon