Rosetta foi una sonda espacial de l'Axencia Espacial Europea destinada al estudiu del cometa 67P/Churyumov-Gerasimenko. Foi la primer misión que consiguió entrar n'órbita alredor del nucleu d'un cometa y acompañalu nel percorríu alredor del Sol.
Foi llanzada'l 2 de marzu de 2004 per aciu d'un Ariane 5 dende'l Centru Espacial de Kourou. Pa llograr el so oxetivu realizó cuatro maniobres d'asistencia gravitatoria —tres cola Tierra y una con Marte— y sobrevuelos de los asteroides 2867 Šteins y 21 Lutetia.
Tres un periodu d'ivernación nel espaciu fondu, Rosetta espertó en xineru de 2014 y llegó al cometa 67P n'agostu d'esi añu. El 12 de payares de 2014 lliberó'l módulu d'aterrizaxe Philae, que realizó'l primer aterrizaxe d'una sonda sobre'l nucleu d'un cometa.
Rosetta estudió la composición del gas y el polvu del cometa, la estructura del nucleu y los cambios provocaos pola radiación solar. Los resultaos de la misión ayudaron a investigar la formación primitiva del Sistema Solar y el posible papel de los cometes nel suministru d'agua y molécules orgániques a la Tierra.
La misión acabó'l 30 de setiembre de 2016 con un descensu controláu de Rosetta sobre la superficie del cometa.
Referencies
Enllaces esternos
Categoría:Sondes espaciales Categoría:Esploración de cometes Categoría:Misiones de l'Axencia Espacial Europea Categoría:Naves y artefautos espaciales llanzaos en 2004