Ella Josephine Baker foi una activista d'Estaos Xuníos polos derechos civiles, organizadora comunitaria y una de les figures fundamentales del movimientu afroamericanu del sieglu XX. Trabayó cola NAACP, la Southern Christian Leadership Conference (SCLC) y el Student Nonviolent Coordinating Committee (SNCC), defendiendo modelos de lideralgu colectivu y organización de base.«Women in the African American Civil Rights Movement», National Park Service.
Biografía Baker nació en Norfolk, Virginia, y crióse en Carolina del Norte. Estudió na Shaw University de Raleigh, onde se graduó en 1927 como la meyor estudiante de la so promoción. Treslladóse depués a Nueva York y participó en organizaciones sociales, cooperatives y movimientos contra la desigualdá económica.
En 1940 empezó a trabayar pa la National Association for the Advancement of Colored People (NAACP). Como secretaria de campu viaxó extensamente pol sur d'Estaos Xuníos creando y reforzando seiciones locales. Baker defendía que les organizaciones teníen que formar nuevos cuadros y evitar depender exclusivamente de figures carismátiques.
Tres el boicó a los autobuses de Montgomery participó na creación de la Southern Christian Leadership Conference y trabayó na so oficina d'Atlanta. En 1960, dempués de les protestes estudiantiles contra la segregación en establecimientos públicos, convocó una conferencia na Shaw University que llevó a la creación del Student Nonviolent Coordinating Committee.
Baker defendió la independencia del SNCC frente a organizaciones y líderes de mayor edá. El grupu convertiríase nuna pieza central de les campañes de sentaes, Freedom Rides, rexistru electoral y Freedom Summer. La so filosofía organizativa resumíase na idea de desarrollar capacidaes locales en cuenta d'imponer una dirección centralizada.
Continuó participando en movimientos contra'l racismu, la pobreza, el colonialismu y la guerra hasta los últimos años de la so vida. La influencia de los sos métodos d'organización estendióse a movimientos sociales posteriores n'Estaos Xuníos.
Referencies
Enllaces esternos
Categoría:Activistes polos derechos civiles d'Estaos Xuníos Categoría:Afroamericanos Categoría:Nacíos en Virginia