Carmen Prieto Álvarez-Valdés (Uviéu, 1943) Bibliotecaria astur.
Biografía El so padre foi Paulino Crisanto Prieto Álvarez-Buylla (1897-1995), un médicu mui conocíu n’Uviéu, concretamente pediatra y médicu de la Beneficencia Municipal uvieína. Criòse na cai Uría. Licencióse n’Historia pola Universidá de Salamanca y, dempués d’un curtiu pasu pola enseñanza, empezó la so trayectoria profesional nel ámbitu de les biblioteques. El 1 de xineru de 1971 incorporóse como bibliotecaria a la Biblioteca Universitaria d’Uviéu y, dende 1972, pasó a trabayar na Biblioteca Pública d’Uviéu. A partir del 15 de xunetu de 1985 asumió la xefatura de la Seición de Biblioteques encargada de la coordinación de la Rede de Biblioteques Públiques d’Asturies. Nesi puestu tuvo un papel destacáu nel desarrollu y profesionalización de la rede bibliotecaria asturiana, especialmente na coordinación de les biblioteques municipales, na formación del personal y nel procesu d’informatización de los servicios. Ella mesma recordó que, a lo llargo d’esos años, llegó a conocer bona parte d’Asturies visitando y poniendo en marcha biblioteques y centros de llectura.
Ente 1998 y 2002 foi directora de la Biblioteca d’Asturies «Ramón Pérez de Ayala». En 2003 volvió ocupar el cargu de xefa de la Seición de Coordinación Bibliotecaria del Principáu d’Asturies, responsabilidá que desempeñó hasta la so xubilación, el 12 de xineru de 2009, depués de cerca de cuatro décades dedicaes al serviciu públicu de la llectura.
La so actividá profesional nun se limitó a la xestión de les biblioteques. Carmen Prieto publicó artículos y trabayos sobre biblioteconomía y sobre la historia y evolución de les biblioteques asturianes. Ente les sos publicaciones destaca La Red de Bibliotecas del Principado de Asturias, escrita con Ana Rodríguez Navarro en 1988, y La Red de Bibliotecas del Principado de Asturias, 1979-1996: evolución, presentada nel VI Congresu Nacional d’ANABAD. Tamién participó, xunto con otres profesionales, nel estudiu sobre’l Catálogu Colectivu de la Rede de Biblioteques Públiques del Principáu d’Asturies.
Carmen Prieto foi tamién una gran defensora de la biblioteca como serviciu públicu y como espaciu vivu de cultura, non como simple almacén de llibros. Nel so trabayu destacó especialmente la importancia d’acercar la llectura a los pueblos y a les zones pequeñes d’Asturies, y valoró de manera especial la formación y profesionalización de los bibliotecarios.
La so vinculación colos llibros vien, amás, de la propia familia. Criada n’Uviéu nun ambiente onde la llectura tenía un papel importante, Carmen Prieto recordó la biblioteca que reuniera’l so padre y la influencia de la so madre, ex-alumna de l'Instituciòn Libre de Enseñanza, que-y tresmitió dende neña l’amor polos llibros y pola llectura. Na so casa familiar había, ente otros fondos, obres asturianes antigües y llibros procedentes de los sos antepasaos. Dempués de la so xubilación siguió vinculada a la cultura bibliográfica asturiana. En 2022 donó a la Biblioteca d’Asturies diversos documentos de gran interés, ente ellos dos cartes autógrafes de Leopoldo Alas «Clarín» y una carta de Ramón Pérez de Ayala, amás d’otres pieces procedentes del patrimoniu familiar.
Referencies Fusiòn Asturias: Carmen Prieto BiblioAsturias: Carmen Prieto Una plaza con nombre de bibliotecaria
Categoría:Persones d'Uviéu