Robo de fruta, tamién conocida como Ladrones de fruta y Por robar fruta, ye una película muda asturiana de ficción rodada en Xixón en 1905 y atribuyida al fotógrafu y pioneru del cine Javier Sánchez Manteola. La historiografía considérala la primer película de ficción asturiana conocida.De la Madrid Álvarez, Juan Carlos (1996). Cinematógrafo y "varietés" en Asturias (1896-1915). Uviéu: Serviciu de Publicaciones del Principáu d'Asturies, p. 108. ISBN 84-7847-435-8.Álvarez-Vázquez, Eva (2025). «Un cine de resistencia. El papel fundamental del cine asturiano en la construcción de identidad y memoria», en Estudios asturianos en el siglo XXI. Xixón: Ediciones Trabe, p. 94.
La cinta, de carácter cómicu, rodóse principalmente en Somió y nel entorno del ríu Piles, cola participación de persones conocíes de la sociedá xixonesa. Estrenóse nel Salón Luminoso de Xixón nel branu de 1905 y tuvo una bona acoyida ente'l públicu local.Lorenzo Benavente, Juan Bonifacio (1986). «Hojeando el viejo álbum en el centenario de Laureano Vinck», Exposición Centenario de Laureano Vinck. Valladolid: Sala Vinck.El Comercio, Xixón, 25 de xunetu de 1905, p. 2; reproducíu en «Gijón 1896-1906», GRIMH. Nun se conoz nenguna copia conservada de la película.«Nostálgicas cintas cinematográficas. La Asturias muda: ocho películas pioneras», El Blog de Acebedo, 9 de febreru de 2020.
Producción y rodaxe
Javier Sánchez Manteola, fotógrafu establecíu en Xixón y vinculáu al Salón Luminoso, ye consideráu pola historiografía responsable de la realización de Robo de fruta.Seguin Vergara, Jean-Claude. «Javier Sánchez Manteola», GRIMH. Les cróniques de prensa de 1905 que se conserven describen la película y el so carácter local, anque nun inclúin unos créditos téunicos como los que se xeneralizaríen posteriormente nel cine.
Según la reconstrucción de Juan Bonifacio Lorenzo Benavente a partir del archivu familiar de José Manuel Lorenzo Fernández, la película filmóse con un aparatu adquiríu poco primero pola empresa del Salón Luminoso y nel rodaxe participó tamién el fotógrafu Laureano Vinck. Una publicación biográfica posterior sobre Vinck rellaciona igualmente'l rodaxe con Julio Peinado y sitúa'l percorríu de l'acción ente Somió y Viñao, pasando por propiedaes de les families Bustillo y Pidal.Rodríguez Muñoz, Javier (1992). «Asturias. Fotos y retratos de Laureano Vinck». Xixón: Silverio Cañada. ISBN 84-7286-331-X. Estes fontes nun permiten, sicasí, establecer con precisión el repartimientu de funciones téuniques ente les persones implicaes.
La prensa contemporánea confirma directamente que parte de la cinta se rodó en Somió y nes proximidaes del ríu Piles, y que nes imáxenes apaecíen persones de la localidá.El Comercio, Xixón, 2 de setiembre de 1905, p. 2; reproducíu en «Gijón 1896-1906», GRIMH.
Argumentu
Al nun conservase nenguna copia conocida, l'argumentu de Robo de fruta reconstruyóse a partir de testimonios y publicaciones posteriores. Tratábase d'una historia cómica alredor del robu de fruta y de la persecución de los responsables, un esquema narrativu frecuente nel cine cómicu de los primeros años del sieglu XX.
L'acción empezaba na zona de Somió y desarrollábase a lo llargo d'un percorríu que les fontes posteriores asocien a les propiedaes de les families Bustillo y Pidal, el ríu Piles y el sector de Viñao. La presencia d'estos escenarios reales y de persones reconocibles de Xixón reforzaba'l carácter local de la película, unu de los elementos que más destacó la prensa nel momentu de la so exhibición.
Una reconstrucción divulgativa posterior identifica ente les persones que participaben na cinta a dos figures populares de la ciudá: «Rigueletu», pescador, y «Pilonga», vendedor de periódicos y acomodador del Salón Luminoso. Al nun esistir la película nin unos créditos contemporáneos completos, estos datos dependen de les fontes posteriores que conservaron memoria del rodaxe.
Estrenu y recepción
Juan Bonifacio Lorenzo Benavente fecha l'estrenu de Robo de fruta nel Salón Luminoso el sábadu **22 de xunetu de 1905**. La documentación hemerográfica disponible ye compatible con esa fecha: El Comercio del 25 de xunetu, al informar de les sesiones celebraes el domingu anterior, citaba Ladrones de fruta ente les cintes que más llamaren l'atención del públicu y destacaba'l so marcáu carácter local y la presencia de mozos conocíos de Xixón.
La película siguió formando parte de la programación del Salón Luminoso les selmanes siguientes. El 2 de setiembre, El Comercio anunció una nueva exhibición de Robo de fruta pal sábadu y el domingu a petición del públicu, precisando que la cinta fuera tomada en Somió y nel ríu Piles y que nella apaecíen persones de la localidá. Tres díes dempués, El Noroeste referíase a la mesma obra col títulu Por robar fruta, indicaba igualmente que taba rodada en Somió y señalaba la bona respuesta de los espectadores.El Noroeste, Xixón, 5 de setiembre de 1905, p. 3; reproducíu en «Gijón 1896-1906», GRIMH.
Les variantes Ladrones de fruta, Robo de fruta y Por robar fruta, polo tanto, nun son denominaciones creaes pola historiografía posterior, sinón títulos emplegaos yá na dómina de la exhibición de la película.
Importancia histórica y conservación
La consideración de Robo de fruta como primer película asturiana tien de precisase: nun foi la primer filmación realizada n'Asturies, sinón la primer película de ficción asturiana conocida. Yá a finales del sieglu XIX rodárense na comunidá vistes cinematográfiques, ente elles Vista de un rompeolas tomada desde el cerro de Santa Catalina, fechada en 1897. Tamién primero de 1905 el Salón Luminoso proyeutara filmaciones de temática xixonesa, como Salida de las cigarreras de la fábrica de Tabacos de Gijón, anunciada pola prensa en xunetu de 1903.El Noroeste, Xixón, 16 de xunetu de 1903, p. 2; reproducíu en «Gijón 1896-1906», GRIMH.
La singularidá de Robo de fruta ta, poro, nel pasu de les vistes y filmaciones d'actualidá a una obra construyida alredor d'un argumentu y protagonizada por persones que representaben una situación ficticia. Esa condición esplica'l llugar que-y atribúin los estudios sobre los primeros años del cine asturianu. La película considérase perdida y nun se conoz nenguna copia nin fragmentu conserváu. La información disponible sobre ella procede, por tanto, de la prensa xixonesa de 1905, de documentación privada recuperada posteriormente y de los estudios históricos dedicaos a los oríxenes del cine n'Asturies.
Ver tamién
Cine asturianu Cine mudu Historia del cine
Referencies
Enllaces esternos
Documentación hemerográfica de Xixón ente 1896 y 1906 en GRIMH «Hojeando el viejo álbum en el centenario de Laureano Vinck»
Categoría:Películes de 1905 Categoría:Películes mudes Categoría:Cine asturianu Categoría:Películes perdíes Categoría:Películes asturianes