50 Capricorni (50 Cap)50 Capricorni (SIMBAD) ye una estrella na constelación de Capricorniu asitiada a pocu más de 1,5º al norte de la eclíptica. De magnitú aparente +7,01, alcuéntrase a 205 años lluz de distancia del Sistema Solar.
50 Capricorni ye una estrella blancu-mariella de la secuencia principal de tipu espectral F6V que, al igual que'l nuesu Sol, llogra la so enerxía a partir de la fusión nuclear del hidróxenu. La so superficie tien una temperatura ente 6485 y 6520 K y relluma con una lluminosidá 5 vegaes mayor que la lluminosidá solar. Tien un radiu un 75% más grande que'l radiu solar y xira sobre sigo mesma con una velocidá de rotación igual o superior a 14 km/s. Les nanes marielles análogues al Sol roten amodo —el Sol tien una velocidá de rotación ecuatorial de 2 km/s— ente que les estrelles más masives roten muncho más apriesa. La división ente estos dos grupos ye bastante abrupta y cai aproximao en mediu del tipu espectral F, asitiándose 50 Capricorni cerca d'esta llende.
50 Capricorni tien una metalicidá equiparable a la solar ([Fe/H] = -0,01). La so masa ye un 38% mayor que la masa solar, envalorándose la so edá nel rangu de 1800 - 2200 millones d'años.
Referencies
Categoría:Estrelles Categoría:Constelación de Capricorniu