Delta Cygni (δ Cyg / 18 Cygni / HD 186882) ye la cuarta estrella más brillosa de la constelación de Cygnus con magnitú aparente +2,86. Anque güei nun tien nome propiu, d'antiguo yera conocida como Ruc —o Rukh— y Urakhga, dambos rellacionaos con Roc, un páxaru míticu d'enorme tamañu y fuercia. Los términos Rukh y Urakhga provienen del persa y del acadiu respeutivamente. Otru nome utilizáu, ésti d'orixe árabe, foi Al Fawaris (الفوارس), que significa «los caballeros».
A una distancia de 171 años lluz del Sistema Solar, Delta Cygni ye un sistema estelar con dos componentes bastante próximes ente sigo y una tercera más alloñada. Les estrella visible ye una subxigante blanca de tipu espectral B9.5IV y 9800 K de temperatura. Con una masa ente 3 y 3,3 mases solares, tien un radiu 4,7 vegaes más grande que'l del Sol y ye 180 vegaes más lluminosa qu'ésti. Al igual qu'otres estrelles calientes, la so velocidá de rotación ye bien alzada —siquier 135 km/s—, 60 vegaes mayor que la del Sol. La so compañera ye una estrella blancu-mariella de tipu espectral F1V con una temperatura de 7300 K y una lluminosidá 6,2 vegaes mayor que la lluminosidá solar. La so masa envalórase un 60% mayor que la del Sol. La separación media ente dambes estrelles ye d'aproximadamente 157 UA —la escentricidá de la órbita fai que la distancia ente elles varie ente 84 y 230 UA— con un periodu orbital de 780 años. La tercera componente, de magnitú 12, ta muncho más alloñada. Ye una nana naranxa de tipu K5 V con una masa de 0,66 mases solares.
Delta Cygni va ser la Estrella Polar mientres siquier cuatro sieglos alredor del añu 11250 NE.
Referencies
Delta Cygni (SIMBAD) Delta Cygni (Stars, Jim Kaler)
Categoría:Estrelles Categoría:Subxigantes Categoría:Constelación de Cygnus