Merope o Mérope (23 Tauri / HD 23480 / HR 1156) ye'l nome d'una de les estrelles del cúmulu abiertu de les Pléyades na constelación de Tauru. Con magnitú aparente +4,14 ye la quinta estrella más brillosa del cúmulu y alcuéntrase a 440 años lluz de distancia del Sistema Solar. Mérope ye'l nome de la séptima de les Pléyades, fíes del titán Atles y de la oceánide Pléyone.
Carauterístiques físiques
Merope ye una estrella subxigante blancu-azulada de tipu espectral B6IVe con una temperatura de 14.000 K. La so lluminosidá equival a 630 soles y el so radiu ye de 4,3 radios solares. Como la mayor parte de les estrelles de les Pléyades, la so velocidá de rotación ye bien alta, a lo menos 280 km/s —140 vegaes la del Sol—, completando un xiru en namái 18 hores. De resultes d'ello, alredor de la estrella esiste un discu de gas qu'emite radiación, siendo Merope, al igual qu'otres estrelles del cúmulu, una estrella Be. Anque'l discu ye más finu que'l de Pléyone (28 Tauri), ésti ye lo suficientemente trupu y caliente como pa xenerar rayos X.
Merope ye una estrella variable Beta Cephei, con pequeños cambeos de rellumu del orde de 0,01 magnitúes. Recibe la denominación, como variable, de V971 Tauri.
NGC 1435
En redol a Merope alcuéntrase una nebulosa de reflexón, llamada NGC 1435 o Nebulosa Merope. Ye parte d'una nebulosa que'l cúmulu de les Pléyades ta travesando y que presenta l'área más brillosa alredor de Merope. Anque nun principiu pensóse que yera'l restu de la nube a partir de la cual formáronse les Pléyades, anguaño créese que l'alcuentru cola nebulosa ye casual.
Referencies Merope - Be Star (SIMBAD) Merope (Stars, Jim Kaler)
Referencies
Enllaces esternos
Categoría:Estrelles Categoría:Subxigantes Categoría:Estrelles variables Categoría:Variables Beta Cephei Categoría:Cúmulu de les Pléyades Categoría:Constelación de Tauru