thumb|right|200px|Póster oficial de los Xuegos Olímpicos de Londres 1948. Los Xuegos Olímpicos de Londres 1948, conocíos oficialmente como Xuegos de la XIV Olimpiada, celebráronse en Londres (Reinu Xuníu) ente'l 29 de xunetu y el 14 d'agostu de 1948. Fueron los primeres dempués d'un paréntesis de doce años, una y bones les ediciones de 1940 y 1944 se suspendieren pola Segunda Guerra Mundial. Participaron un total de 4.104 atletes (3.714 homes y 390 muyeres) de 59 países.
Nun contestu marcáu pola economía de posguerra, esta edición foi conocida como «los Xuegos de l'Austeridá». Londres taba siendo reconstruyida tres los bombardeos alemanes de la guerra y la población escarecía de bienes básicos, polo que munchos británicos taben en contra de la designación. Por esa razón, nun se construyó nenguna infraestructura olímpica nueva. En cuenta d'ello utilizaron les yá esistentes y l'estadiu de Wembley foi afechu pa ser l'estadiu olímpicu, construyéndose una pista de ceniza pa les pruebes d'atletismu. El Támesis acoyó les pruebes de remu y piragüismu. Tampoco s'edificó una villa olímpica: los atletes dormieron en barracones que mientres el conflictu fueron d'usu militar.
Los efeutos de la guerra tamién se notaron na participación. El Comité Olímpicu Internacional nun dexó qu'Alemaña nin Xapón participaren pol so papel como fuercies de la Exa. Anque la Xunión Soviética sí foi convidada, nun quixo participar hasta los Xuegos Olímpicos de Ḥélsinki 1952. Magar eses ausencies, batióse'l récor de naciones participantes.
El parón de doce años provocó que munchos atletes dexaren los sos meyores años de competición. Otros inclusive finaron mientres la guerra. Por esta razón, el númberu de récores foi bien baxu respectu al d'otres ediciones. Tovía asina, hubo actuaciones destacaes como les de la neerlandesa Fanny Blankers-Koen, ganadora de cuatro pruebes d'atletismu; Alice Coachman, primer muyer afroamericana en ganar una medaya d'oru, y Bob Mathias, deportista más nuevu en vencer una prueba con solu 17 años. El máximu medayista foi Veikko Huhtanen con cinco presees (trés d'oru) en ximnasia.
Los Xuegos Olímpicos de Londres 1948 fueron los primeres que pudieron vese per televisión. La BBC pagó 1.000 guinees polos derechos d'emisión de 60 hores de pruebes deportives.
Eleición de sede En xunu de 1939, na 39ª Sesión del Comité Olímpicu Internacional (COI), aprobóse que Londres (Reinu Xuníu) entamara los Xuegos Olímpicos de Branu de 1944. L'españíu de la Segunda Guerra Mundial provocó la cancelación del eventu, asina que se-y concedió por defectu la siguiente edición, prevista pa 1948.
La guerra terminó en 1945 y a tres años del eventu Londres taba bien lloñe de ser l'escenariu d'un acontecimientu internacional. La capital británica fuera bombardiada polos aviones de la Luftwaffe alemana mientres el denomáu Blitz. Más de 30.000 londinenses finaron nesos ataques y dellos barrios quedaron esfarrapaos. En tol Reinu Xuníu estableciérase'l racionamientu pola escasez de bienes básicos, con una delda cimera al 90% del PIB, ente qu'Europa tamién s'enfrentaba a una dura posguerra. La suma de toos estos factores fixo que'l COI plantegara dase la organización de la XIV Olimpiada a una ciudá d'Estaos Xuníos. Magar tou, el rei Xurde VI del Reinu Xuníu pensó que los Xuegos yeren una gran oportunidá pa salir alantre, y pidió ayuda a otros comités pa celebralos.
L'informe oficial de los Xuegos Olímpicos de Londres 1948 recueye'l siguiente testu:«Los Xuegos de 1944 fueren concedíos a Londres y, poro, n'ochobre de 1945, el presidente del Comité Olímpicu Británicu (BOA), Lord Burghley, viaxó a Estocolmu y visitó al presidente del Comité Olímpicu Internacional (Sigfrid Edström) p'aldericar la cuestión de que Londres fuera escoyida pa esti gran eventu. Como resultancia, la BOA estableció un comité pa trabayar na organización de los Xuegos. Dempués de delles xuntes, encamentaron que l'alcalde de Londres fuera convidáu pa defender la candidatura de Londres pa los Xuegos Olímpicos de 1948.»En marzu de 1946 el Comité Olímpicu Internacional, al traviés de votu per corréu, dio los Xuegos Olímpicos de Branu a Londres y los d'Iviernu a St. Moritz (Suiza).
D'esta miente, Londres convirtióse na segunda ciudá qu'allugaba los Xuegos Olímpicos dos veces, dempués de los Xuegos de 1908. La primera en consiguilo foi París en 1900 y 1924. Londres sería tamién la primer ciudá que los entamaría trés veces, cuando se-yos concedió la edición de 2012.
Deportes Nos Xuegos Olímpicos de Londres celebráronse 136 eventos en 17 deportes oficiales. Amás aceptóse un deporte de demostración, el lacrosse. Nesta edición incluyéronse modalidaes como los 10 quilómetros cola y les versiones femenines de los 200 metros llisos, saltu de llonxitú y llanzamientu de pesu. Foi la última vegada que los participantes nes competiciones d'arte (non incluyíes nesti apartáu) llevaren medayes.
Cada deporte cuntó colos sos propios pictogrames, igual qu'en Berlín 1936. El so diseñu representaba la prueba dientro d'un escudu d'armes. Esti tipu de dibuxos nun se consolidaron nos Xuegos Olímpicos hasta Xuegos Olímpicos de Tokyo 1964. Atletismu (24/9)23x23px Baloncestu (1/0)23x23px Boxéu (8/0)23x23px Ciclismu 23x23px Pista (4/0)23x23px Ruta (2/0)23x23px Deportes acuáticos 23x23px Natación (6/5)23x23px Saltos (2/2)23x23px Waterpolu (1/0)23x23px Equitación (6) Esgrima (6/1)23x23px Fútbol (1/0)23x23px Ximnasia (8/1)23x23px Halterofilia (6/0)23x23px Ḥoquei (1/0)23x23px Llucha 23x23px Llucha grecorromana (8/0)23x23px Llucha llibre (8/0)23x23px Pentatlón modernu (1/0)23x23px Piragüismu (8/1)23x23px Remu (7/0)23x23px Tiru (4/0)23x23px Vela (5)23x23px
Antorcha olímpica Londres 1948 caltuvo la tradición de relevos de l'antorcha olímpica, establecida en Berlín 1936, anque con un enfoque bien distintu.». Llamóse-y «relevu de la paz» porque pasó per dellos países d'Europa, simbolizando la so unión dempués de la Segunda Guerra Mundial. Tuvo llugar del 17 al 29 de xunetu de 1948, con un percorríu de 3.160 quilómetros y 1.416 relevistes (la metá que na última edición).«A gallery of memorable Olympic torch designs».
L'antorcha foi diseñada por Ralph Lavers y hubo tres tipos: una estándar alimentada por combustible sólidu y fecha a base d'aluminiu, una especial alimentada por gas butanu que viaxó a bordu del HMS Whitesand Bay y una tercera pa ingresar al estadiu de Wembley, fecha d'aceru inoxidable y aicionada por una vela de magnesiu.
En total utilizáronse 1.688 antorches. Entós yera habitual que los portadores de la llapada quedaren con ella d'alcordanza. La situación corrixóse en Ḥélsinki 1952, cuando'l COI encargó diseñar antorches úniques.
El percorríu empezó col encendíu del fueu n'Olimpia. La parte griega movióse direutamente a Corfú por culpa de la guerra civil. El buque Whitesand Bay tresportó la llapada a Bari y d'ende dellos relevistes percorrieron Italia, Suiza y Francia. Esta ruta esvióse escontra Bélxica y Luxemburgu, dempués de que los sos gobiernos solicitaren ser parte del percorríu, y tornó a Francia pa un viaxe en barcu dende Calais hasta Dover. Anque hubo munchos problemes, el plan de 12 díes cumplióse y l'antorcha llegó a Wembley namái trelce segundos más tarde de lo entamao.
Organización El máximu responsable del Comité Organizador de los Xuegos Olímpicos foi Lord Burghley, presidente del Comité Olímpicu Británicu y atleta d'ésitu na so mocedá, yá que ganó una medaya d'oru na prueba de 400 metros valles n'Ámsterdam 1928 y cuatro años dempués consiguió la plata en relevos. Dichu Comité tuvo ocupáu por personalidaes de reconocíu prestíu nel deporte británico. Ente ellos atopábase Stanley Rous, presidente de l'Asociación del Fútbol y años dempués de la FIFA.
L'ex-ministru Wyndham Portal aceptó la presidencia de los Xuegos y el rei Xurde VI del Reinu Xuníu asumió'l patronalgu.
Tola organización tuvo marcada pola austeridá propia del tiempu de posguerra. La población de Reinu Xuníu entá escarecía de productos básicos como comida, hidrocarburos y materiales de construcción, y el restu d'Europa nun taba muncho meyor. El Comité dexó claro que nun podíen facese más gastos de los puramente necesarios. Tolos atletes recibieron cartiyes de racionamientu especiales, les mesmes que mineros y estibadores, pa consumir 5.400 caloríes diaries en cuenta de les 2.600 del restu de la población. De la mesma, nun se construyó nenguna infraestructura deportiva nueva nin s'edificó una villa olímpica. Los homes agospiáronse n'instalaciones militares y les muyeres en colexos mayores.
P'amenorgar los gastos del Comité Organizador, el restu de países collaboró na midida de les sos posibilidaes. Estaos Xuníos asumió los costos de tola so delegación, formada por 300 atletes, con alimentos que tresportaron n'aviones B-17 del exércitu. Otros comités donaron comida pa toles delegaciones; Arxentina pasó un cargamentu de carne de vacunu, Dinamarca mandó 160.000 güevos y Países Baxos unvió cien tonelaes de fruta.
Fueron tamién los primeros Xuegos nos que participaron trabayadores voluntarios, tradición que se caltuvo nes ediciones posteriores.
El gastu total foi de 730.000 llibres esterlines y quedó cubiertu colos ingresos xeneraos por caúna de les pruebes.
Sede ya instalaciones deportives miniaturadeimagen|350x350px|Interior del Estadiu de Wembley na década de 1950. miniaturadeimagen|350x350px|En cuenta de crear una villa olímpica como tal, rehabilitáronse instalaciones que mientres la guerra fueron d'usu militar. A diferencia d'otres ediciones, pa Londres 1948 nun se construyó nenguna sede nueva. L'estadiu olímpicu foi l'Estadiu de Wembley, con capacidá pa 82.000 espectadores. La cortil foi afechu a dos meses de la inauguración: sobre la pista de carreres de galgos instalóse una pista d'atletismu provisional, fecha de ceniza.
Per primer vegada na historia d'unos Xuegos Olímpicos, les competencies de natación celebráronse a cubiertu. La sede foi la Empire Pool (actual Wembley Arena), construyida pa los Xuegos de la Mancomunidá de 1934.
Toles pruebes celebráronse na capital británica y na so contorna, salvo delles rondes preliminares de fútbol y la vela. Ente les instalaciones incluyéronse centros icónicos como'l ríu Támesis (remu y piragüismu), el velódromu de Herne Hill (ciclismu en pista) y la Real Academia de Sandhurst (pentatlón modernu).
Sedes na esposición imperial británica Estadiu de Wembley — atletismu, fútbol (semifinales y final), ḥoquei sobre verde (final), equitación (saltos), ceremonies d'apertura y clausura. Piscina Imperial — natación, saltos de trampolín, waterpolu (fase final), boxéu (finales) Palaciu d'Inxeniería — esgrima
Sedes en Londres Centru d'Exhibiciones Earls Court — boxéu, ximnasia, halterofilia, llucha. Finchley Lido — waterpolu Harringay Arena — baloncestu y llucha Parque de Windsor — ciclismu Real Academia de Sandhurst — pentatlón modernu (carrera) Real Canal de Regatas del ríu Támesis — remu y piragüismu Velódromu de Herne Hill — ciclismu en pista Guinness Sports Club — ḥoquei sobre verde Lyons' Sports Club — ḥoquei sobre verde Polytechnic Sports Ground — ḥoquei sobre verde
Sedes fuera de Londres Aldershot: Estadiu Central de Aldershot — equitación (saltos), pentatlón modernu (equitación, esgrima, natación) Fleet, Hampshire: Tweseldown Racecourse — equitación (adomadura y concursu) Surrey Heath: Asociación Nacional del Rifle del Reinu Xuníu — tiro deportivu, pentatlón modernu (tiru) Torbay: Canal de la Mancha — vela
Estadios de fútbol Arsenal Stadium Champion Hill de Dulwich Craven Cottage Cricklefield Stadium Fratton Park (Portsmouth) Goldstone Ground (Brighton) Green Pond Road Griffin Park (Brentford) Selhurst Park White Hart Lane
Participantes miniaturadeimagen|300x300px|En verde apaecen los países participantes. N'azul figuren los debutantes.