Arita Baaijens ye una esploradora, escritora, fotógrafa y bióloga neerlandesa. Foi la primer muyer en travesar en solitario l'ermu oeste d'Exiptu en camellu, viaxar pol Darb el Arbain en dos causes y fotografiar les últimes muyeres sobrevivientes nómades en Mauritania.
Afincada n'Ámsterdam, dexó'l so trabayu como consultora medioambiental pa viaxar a Exiptu y Sudán, que los sos ermos percorrió en camellu. Con 22 años vivió n'Israel y visitó el Sinaí, desiertu que-y dexó una gran buelga y onde se quedó más tiempu del entamáu.
Ye miembru de la Royal Geographical Society, el Explorers Club, el Long Riders Guild y la WINGS WorldQuest.
A partir de los sos viaxes, publicó dellos llibros, unu de los cualos "Desert Songs" foi premiáu en 2008. En 2014 ganó'l premiu Women of Discovery Humanity que da la WINGS WorldQuest en reconocencia y sofitu a muyeres que destaquen na ciencia y la esploración. Esi mesmu añu, la Sociedá Xeográfica Española concedió-y el gallardón "Viaxeru del añu".
Espediciones Mientres más de 15 años percorrió los desiertos d'Exiptu y Sudán, cuasi siempres en solitario, acompañada d'una pequeña caravana de camellos, sirviéndose de ferramientes d'orientación básiques como un compás y un mapa.
Dempués d'estes cuasi dos décades viaxando peles ciudaes del desiertu, escoyó Siberia y el Macizu d'Altái, fronterizu con Rusia, Kazakstán, China y Mongolia, pa buscar el Shambhala, reinu míticu más allá del cordal del Himalaya. Esta espedición de más 100 díes percorriendo una distancia de más de 1500 quilómetros foi bautizada como "Search for Paradise".
Referencies
Enllaces esternos Páxina oficial de Arita Baaijens. Discursu en YouTube de Arita Baaijens al recibir el Women of Discovery 2014 (n'alemán). Páxina web dedicada a la Espedición a los montes Altai (n'inglés)
Categoría:Esploradores Categoría:Biólogos y biólogues de los Países Baxos Categoría:Fotógrafos y fotógrafes Categoría:Escritores de los Países Baxos Categoría:Escritores en neerlandés Categoría:Escritores n'inglés