miniaturadeimagen|250x250px|Moneda conmemorativa de la Cadena Báltica de 1989 colos trés países bálticos: Estonia, Letonia y Lituania. La Revolución Cantada ye un términu pa referise a los socesos asocedíos ente 1987 y 1991 que concluyeron cola reinstauración de la independencia de los estaos bálticos: Estonia, Letonia y Lituania. Les tres repúbliques fueron anexonaes pola Xunión Soviética mientres la Segunda Guerra Mundial, primero de resultes del pautu Molotov-Ribbentrop (1940) y más tarde cola ocupación d'esos territorios en 1944 tres la invasión alemana de la Xunión Soviética.
El términu foi acuñáu pol activista estoniu Heinz Valk, que lu utilizó nún artículu sobre les manifestaciones de xunu de 1988 nel Auditoriu del Cantar de Tallin (Lauluväljak), ú se cantaben cantares patrióticos estonios pa reivindicar la independencia del país.
Contestu Nel intre de la Segunda Guerra Mundial, los países bálticos —Estonia, Letonia y Lituania— fueren ocupaos trés vegaes: en 1940 pola Xunión Soviética, de resultes del pautu Molotov-Ribbentrop; en 1941 pol exércitu de l'Alemaña nazi, y en 1944 de nuevu polos soviéticos tres la ofensiva del Bálticu. Anque les tres repúbliques báltiques yeren estaos independientes dende finales de la década de 1910, la XRSS consideró l'anexón de iure de dichos territorios como una «lliberación» de les tropes de la Exa. La mayoría de gobiernos occidentales, encabezaos por Estaos Xuníos y Reinu Xuníu, negáronse a dá-y reconocencia internacional. Col pasu del tiempu, el gobiernu soviéticu favoreció la migración de rusos a esos territorios.
Mientres la segunda metá de los años 1980, la URSS dio empiezu a un procesu d'apertura política (glásnost) y reestructuración económica (perestroika) lideráu por Mikhaíl Gorbachov. Les reformes pretendíen reorganizar el sistema socialista pa poder caltenelo, pero coincidieron con una grave crisis económica y una serie de revoluciones nel bloque del Este que dexaron a los soviéticos ensin aliaos y en cantu de la desintegración federal. Igual qu'otres repúbliques socialistes, les repúbliques báltiques aprovecharon la situación pa reclamar la so independencia de la XRSS.
Anque cada país siguió'l so propiu camín, los fechos asocedíos tuvieron una serie de denominadores comunes que favorecieron el términu «Revolución Cantada» pa referise específicamente a ellos: La reinstauración de la independencia conquistada en 1918. La defensa de la democracia y los derechos humanos, en contraposición al sistema políticu de la URSS. El protagonismu de la cultura llocal y de los Festivales de Cantares y Dances Bálticos. L'establecimientu d'eleiciones competitives na XRSS, cola creación del Congresu de los Diputaos del Pueblu. La mayor aición común de les trés repúbliques báltiques foi la formación de la Cadena Báltica el 23 d'agostu de 1989: más d'un millón de persones formaron una cadena humana a lo llargo de 600 quilómetros dende Tallin hasta Vilnius. Una selmana anaantes de la protesta, la XRSS almitiera la esistencia del pactu Ribbentrop-Mólotov, pero siguía aportunando en que los trés estaos xuntárense voluntariamente a la Xunión Soviética.
La Xunión Soviética terminó reconociendo la independencia de les trés repúbliques báltiques el 6 de setiembre de 1991. Tres esi anunciu, Estonia, Letonia y Lituania ingresaron na Organización de les Naciones Xuníes el 17 de setiembre.
Estonia left|miniaturadeimagen|300x300px|Fachada del Parllamentu d'Estonia, frente al que s'asitiaron munches de les barricaes en prevención de posibles ataques soviéticos en 1991. Cola aprobación de les reformes polítiques na URSS, multiplicáronse les manifestaciones d'oposición política na RSS d'Estonia. Una de les primeres produciose na primavera de 1987, cuando una asociación ciudadana de Tartu consiguió detener los planes del gobiernu soviéticu de crear nueves mines de fosfatu, por aciu d'una resistencia non violenta. L'ésitu de la manifestación animó a los grupos en defensa de los derechos humanos y a los nacionalistes estonios pa entamase pola reinstauración de la independencia.
Nel branu de 1987 hubo dos importantes movimientos organizativos. Per un sitiu, la creación de l'Asociación pola Publicación del Pactu Ribbentrop-Mólotov (MRP-AEG), encabezada por disidentes políticos y sofitada públicamente por congresistes de los Estaos Xuníos. Y per otru llau, una carta abierta na que políticos del Partíu Comunista d'Estonia (EKP) reclamaben la transición hacia una autonomía real, daqué que favoreció un alderique internu nel senu del partíu. El 21 d'ochobre hubo una marcha en Võru pa conmemorar a los cayíos na Guerra d'Independencia de 1918, na que les autoridaes dexaron banderes tricolores d'Estonia, hasta entós prohibíes.
Les concentraciones favorecieron que les peticiones de los nacionalistes y independentistes foran asumíes por numberosos miembros del EKP. El 13 d'abril de 1988, el dirixente Edgar Savisaar anunció en televisión la creación del Frente Popular d'Estonia (Rahvarinne), n'orixe un grupu «de sofitu a la perestroika» qu'al poco tiempu convirtiose na principal organización pola independencia d'Estonia, responsable de la mayoría de marches. Ún de los sos líderes foi Lennart Meri, que sedría dempués presidente estoniu de 1992 a 2001. miniaturadeimagen|Manifestantes en Tartu (1989). Un puntu d'inflexón nos movimientos populares marcolu la celebración del tradicional Festival del Cantar Estoniu (Laulupidu) de xunu de 1988. Cerca de 100.000 persones cantaron himnos y cantares patrióticos, dalgunos d'ellos prohibíes. Tres el festival, el Partíu Comunista de la URSS cesó a Karl Vaino, miembru del sector más conservador, y nomó como nuevu Primer Secretariu del EKP a Vaino Väljas, próximu al nacionalismu. En setiembre del mesmu añu, el Frente Popular entamó otru festival musical en Tallin (Eestimaa laul) al qu'asistieron cerca de 300.000 persones, una quinta parte de la población del país. La naturaleza artística de les marches favoreció que Heinz Valk acuñara'l términu «Revolución Cantada» pa referise a la situación política del Bálticu.
Dempués de que Gorbachov anunciara la creación del Congresu de los Diputaos del Pueblu de la URSS, el Sóviet Supremu d'Estonia funcionó como una verdadera cámara llexislativa rexonal. Ente les lleis aprobaes merecen destacase la declaración de soberanía (16 de payares de 1988), l'aprobación del estoniu como llingua oficial (xineru de 1989), la llei d'independencia económica (mayu de 1989, aceptada pola XRSS) y les lleis de residencia pa votar nes siguientes eleiciones (agostu de 1989). El 24 de febreru de 1989 izose per primer vegada la bandera tricolor na torre del Pikk Hermann, y el 26 de marzu hubo eleiciones al Congresu de los Diputaos nes que los candidatos que presentaba'l Frente Popular algamaron la mayoría.
Al marxe de les instituciones soviétiques, en febreru de 1989 estableciose un movimientu ciudadanu, conocíu como Congresu de Ciudadanos Estonios, nel que podía rexistrase cualquier ciudadanu estoniu por ius sanguinis o aspirante a la ciudadanía, lo que dexaba fora al restu de la población (principalmente, estonios rusos). Un añu dempués inscribiéranse más de 600.000 persones. El Congresu d'Estonia, celebráu del 11 al 12 de marzu, cuntó con 499 representantes.
El 18 de marzu de 1990 celebráronse eleiciones llexislatives democrátiques, les primeres dende 1932: los partidarios de la independencia llograron 73 de los 105 escaños en xuegu. Escoyóse como presidente del Sóviet Supremu al excomunista Arnold Rüütel, mentantu que Edgar Savisaar foi nomáu primer ministru. Pesie a les alvertencies de Moscú, Estonia fixo una primera declaración d'independencia el 8 de mayu de 1990, anque nunos términos más suaves que la lituana, al caltener la Constitución de la XRSS mientres que se redactaba la estonia. La XRSS nun reconoció esa votación. Dempués que los tanques soviéticos apruxeren en Lituania en xineru de 1991, los estonios colocaron barricaes alredor del parllamentu. Pela so parte, Rüütel y Savisaar priorizaron les rellaciones diplomátiques col presidente del Sóviet Supremu de Rusia, Borís Yeltsin, pa que intercediera ante Gorbachov y evitara asina un derramamientu de sangre.
El 3 de marzu de 1991 la declaración d'independencia foi aprobada en referendu con un altu porcentaxe de sofitu (78%) y participación (82% del censu). La consulta celebrose dos selmanes antes del referendu sobre'l futuru de la XRSS. Anque la XRSS trató de caltener el control de la situación, el 19 d'agostu hubo un intentu de golpe d'Estáu que precipitó los acontecimientos. Al otru día, el 20 d'agostu de 1991, el parllamentu proclamó la restauración de la independencia de la República d'Estonia. Rusia y la Comunidá Europea reconocióla nuna selmana, y la XRSS fízolo'l 6 de setiembre.
La prudencia estratéxica de los estonios favoreció que'l país consiguiera la independencia ensin qu'hubiera víctimes mortales, siendo la única república exsoviética na qu'eso asocedió.
Letonia left|miniaturadeimagen|310x310px|Monumentu a la Llibertá de Riga, n'honor a los cayíos na guerra d'independencia de 1918. El movimientu nacionalista na RSS de Letonia foi denomináu «Tercer Espertar Nacional» (latviešo tautas atmoda), en continuación del de los Mozos Letonos (década de 1850) y de la proclamación d'independencia de 1918. Igual qu'asocedió n'Estonia, les movilizaciones surdieron arriendes de una protesta ciudadana tolerada nel glásnost: en 1986 un grupu de ciudadanos fundó la ONG «Club de Proteición Medioambiental» (VAK, poles sos sigles en letón) pa protestar escontra la construcción d'una central hidroeléctrica nel ríu Daugava. Un mozu periodista, Dainis Īvāns, llogró axuntar más de 30.000 firmes, que forzaron la cancelación del proyeutu. Esi ésitu animó a los nacionalistes letonos, que se reorganizaron nel coleutivu Helsinki-86 pa reclamar derechos humanos y la reinstauración de la soberanía.
El 14 de xunu de 1987, los miembros de Helsinki-86 entamaron una ufrienda floral nel Monumentu a la Llibertá de Riga, símbolu de la independencia de Letonia, n'homenaxe a los letones que fueron deportaos esi mesmu día en 1941, a la qu'asistieron 5000 persones(en letón) "Latvijas Enciklopēdija" (I sējums) Rīga 2002 SIA "Valērixa Belokoņa izdevniecība" ISBN 9984-9482-1-8. La sociedá trató de repitilo'l 23 d'agostu pa denunciar el pactu Ribbentrop-Molotov, pero esta vegada l'ensame foi disueltu con cañones d'agua. Col pasu del tiempu, Helsinki-86 foi movíu por distintos movimientos nacionalistes y por alderiques nel senu del Partíu Comunista de Letonia (LKP) sobre la proteición d'idioma letón, la rusificación y la soberanía económica.
La música tamién xugó un papel importante nel espertar nacional, con dos eventos destacaos: l'estrenu de la ópera rock Lāčplēsis —basada en l'héroe nacional—, y la celebración del Festival del Cantar y Danza de Letonia en 1990.
El 8 d'ochobre de 1988 fundose'l Frente Popular de Letonia (LTF, Latvijas Tautas fronte), qu'arrexuntó a los distintos grupos nacionalistes. La formación taba liderada por Dainis Īvāns y cuntó dende'l principiu col sofitu de miembros moderaos del LKP, ente ellos el presidente del Sóviet Supremu Anatolijs Gorbunovs. En menos d'un añu superaron los 250.000 miembros, na so gran mayoría d'etnia letona. Y anque nel LTF hubiera de primeres distintes sensibilidaes, a partir de 1989 defendería la independencia como única solución. Esto provocó que munches persones d'etnia rusa, llegaes mientres la rusificación, fueren más favorables al Inferfront, un movimientu popular prosoviéticu.