L'Alministración Espacial Nacional China (en chinu simplificáu: 国家航天局; pinyin: Guójiā Hángtiānjú; n'inglés: China National Space Administration, CNSA) ye l'organismu gubernamental de la República Popular China responsable de la xestión de les actividaes espaciales civiles del país y de la cooperación espacial internacional.
Historia La CNSA creóse en 1993, tres una reorganización de la industria aeroespacial china. Ente les sos funciones tán la ellaboración de polítiques y planes pal sector espacial, la organización de grandes proyeutos espaciales, la supervisión de proyeutos civiles d'investigación y la representación del Gobiernu chinu na cooperación espacial internacional.
En 2007, China llanzó Chang'e 1, la primer misión del so programa d'esploración llunar. El programa siguió con misiones como Chang'e 3, que realizó un allunizaxe en 2013; Chang'e 4, que consiguió en 2019 el primer allunizaxe na cara oculta de la Lluna; Chang'e 5, que traxo muestres llunares a la Tierra en 2020, y Chang'e 6, que retornó en 2024 les primeres muestres de la historia recoyíes na cara oculta de la Lluna.
La CNSA coordina tamién el programa d'esploración planetaria Tianwen. Tianwen-1, llanzada en 2020, convirtióse na primer misión china independiente a Marte, mientres que Tianwen-2 llanzóse en 2025 pa estudiar y recoyer muestres del asteroide 469219 Kamoʻoalewa y realizar posteriormente un alcuentru col cometa 311P/PANSTARRS.
Alministración L'alministrador de la CNSA ye Shan Zhongde, que tamién ocupa'l cargu de viceministru d'Industria y Tecnoloxía de la Información. L'inxenieru xefe ye Li Guoping.
Centros de llanzamientu Los principales centros de llanzamientu utilizaos pol programa espacial chinu son:
Jiuquan, emplegáu, ente otros usos, pa llanzamientos a órbites d'enclín mediu y misiones tripulaes. Xichang, utilizáu especialmente pa misiones a órbites altes y d'esploración espacial. Taiyuan, especializáu principalmente en llanzamientos a órbites polares y heliosíncrones. Wenchang, na islla de Hainan, utilizáu por vehículos pesaos como'l Llarga Marcha 5.
Proyeutos El Programa chinu d'esploración llunar tien previstes Chang'e 7, destinada a estudiar la rexón del polu sur llunar, y Chang'e 8, prevista alredor de 2029 pa realizar investigaciones científiques y esperimentos d'aprovechamientu in situ de recursos. Estes misiones van contribuyir a preparar la futura Estación Internacional d'Investigación Llunar.
Nel programa Tianwen, China prepara Tianwen-3, destinada a recoyer y devolver muestres de Marte, y Tianwen-4, que va esplorar el sistema de Xúpiter.
El programa espacial tripuláu, qu'inclúi les naves Shenzhou y la Estación Espacial Tiangong, ta xestionáu pola Axencia Espacial Tripulada de China y non directamente pola CNSA.
Referencies
Enllaces esternos
Páxina oficial de la CNSA
China, Alministración Espacial Nacional China, Alministración Espacial Nacional Categoría:Organizaciones fundaes en 1993