Anna Cecilia Malmström ye una política sueca, qu'anguaño ocupa'l cargu de Comisaria de Comerciu na Comisión Europea dende'l 1 de payares de 2014.
Cecilia Malmström nació n'Estocolmu, y creció en Gotemburgu y Francia. Fala suecu, inglés, español y francés de forma fluyida y tamién fala un pocu d'alemán ya italianu. Mora anguaño en Gotemburgu col so home y los sos dos fíes ximielgues.
Antes d'ocupar esti cargu, foi Ministra d'Asuntos Europeos del Gobiernu suecu, ente 2006 y 2010 y eurodiputada ente 1999 y 2006. Enantes ocupara cargos a nivel llocal nel conceyu de Gotemburgu
Ye miembru del Partíu Popular Lliberal, que forma parte de l'Alianza de los Demócrates y Lliberales per Europa.
Cuando yera diputada del Parllamentu Européu, yera miembru de la Comisión d'Asuntos Esteriores y miembru sustitutu de la Comisión de Mercáu Internu y Proteición del Consumidor. Mientres el so mandatu como diputada, empecipió la campaña web [oneseat.eu], que'l so oxetivu ye que la sede permanente del Parllamentu Européu seya Bruxeles.
Cecilia Malmström sofita la integración de Suecia nel euru. N'agostu de 2007, foi unu de los políticos que sofitó un nuevu referendu sobre l'adopción del euru (el primeru foi en 2003).
Referencies
Enllaces esternos
(n'inglés) Páxina de la comisaria na web de la Comisión Europea
Categoría:Políticos y polítiques de Suecia Categoría:Comisarios y comisaries de la Xunión Europea Categoría:Persones d'Estocolmu