Вячасла́ў Андрэ́евіч Дубі́нка (, Слуцк — , Мінск) — беларускі пісьменнік, фатограф, мастак і адзін з ініцыятараў адраджэння беларускай выцінанкі.
Біяграфія Нарадзіўся 17 снежня 1941 года ў Слуцку. У школьныя гады займаўся ў студыі выяўленчага мастацтва гарадскога Дома піянераў і школьнікаў пад кіраўніцтвам Уладзіміра Садзіна. Скончыў 5-ю сярэднюю школу Слуцка. У 1961 годзе скончыў будаўнічае аддзяленне Чарнавіцкага чыгуначнага тэхнікума. У 1961—1963 гадах працаваў майстрам і прарабам будаўнічага ўпраўлення, узводзіў ваенныя аб’екты і ракетныя пляцоўкі ў Мазыры, Ельску, Петрыкаве і Бабруйску.
Пазней вучыўся на аператарскім факультэце Усесаюзнага дзяржаўнага інстытута кінематаграфіі.
Быў жанаты, меў дзяцей. Шмат падарожнічаў па Савецкім Саюзе (Енісей, Алтай, Краснаярскі край), калекцыянаваў паштовыя маркі. З’яўляўся членам Саюза журналістаў Беларусі (з 1960-х гадоў), Саюза беларускіх пісьменнікаў (з 1988), Саюза народных майстроў Беларусі (з 2002) і Саюза мастакоў Беларусі (з 2003).
Памёр 10 жніўня 2010 года. Развітанне прайшло 12 жніўня ў памяшканні Управы БНФ у Мінску. Пахаваны на Паўночных могілках.
Творчасць
Фатаграфія і журналістыка У 1963 годзе набыў фотаапарат «Зеніт» і пачаў працаваць фотакарэспандэнтам у слуцкай раённай газеце «Шлях Ільіча». У 1964—1979 гадах быў фотакарэспандэнтам газет «Будаўнік камунізму» (Любань), «Шахцёр» (Салігорск), а таксама рэспубліканскіх выданняў «Звязда» (1966—1971) і «Чырвоная змена» (1972—1974).
У 1974—1976 гадах працаваў у студыі «Фота і жыццё» Саюза журналістаў Беларусі. У 1979—1981 гадах быў фатографам рэстаўрацыйнай майстэрні Міністэрства культуры БССР. З 1981 года — супрацоўнік часопіса «Беларусь». З’яўляўся прызёрам шматлікіх фотавыстаў.
Вячаслаў Дубінка быў цесна звязаны з нацыянальна-адраджэнскім рухам і легендарнай майстэрняй «На Паддашку» мастака Яўгена Куліка. Менавіта Дубінка стварыў унікальны фоталетапіс падзей 30 кастрычніка 1988 года — брутальнага разгону мітынгу-шэсця ў Курапатах («Дзяды-88»). Гэтыя гістарычныя фотаздымкі шырока экспанаваліся на стэндах падчас Устаноўчага з'езда БНФ «Адраджэнне» ў Вільні ў чэрвені 1989 года.
Выцінанка У канцы 1960-х гадоў Вячаслаў Дубінка адрадзіў у Беларусі забытае мастацтва выцінанкі (выразанкі). Творчы працэс пачынаўся падчас доўгіх журналісцкіх камандзіровак на вакзалах і ў цягніках. На пачатку 1970-х гадоў яго арыгінальныя творы пачалі з’яўляцца на мастацкіх выставах. Выкарыстоўваючы вялікія кравецкія нажніцы і пераважна чорную і чырвоную паперу, ён ствараў складаныя ажурныя кампазіцыі: «дрэва жыцця», фігуркі птушак (пеўняў, паўлінаў), звяроў, сюжэтныя пано на тэмы палескіх вандровак і казак.
Выцінанкамі Дубінкі былі аформлены паэтычныя зборнікі і дзіцячыя кнігі шматлікіх беларускіх аўтараў, сярод якіх «Жывыя літары» А. Вольскага, «Казка пра паўліна» В. Іпатавай, а таксама творы Г. Каржанеўскай, В. Хамчук, С. Басуматравай.
Творы майстра набываліся Нацыянальным мастацкім музеем Рэспублікі Беларусь і прыватнымі калекцыянерамі за мяжой. У 2011 годзе, ужо пасля смерці аўтара, выйшаў мастацкі альбом «Вячаслаў Дубінка. Выцінанкі».
Літаратура Першае апавяданне В. Дубінкі было надрукавана ў газеце «Шлях Ільіча». Першая аповесць — «Не плач, душа мая» — пабачыла свет на старонках часопіса «Маладосць». Усяго ён з’яўляецца аўтарам шасці аповесцей.
Сярод выдадзеных кніг прозы і нарысаў: «Паплач ля роднае крынічкі» (1981) «Не плач, душа мая» (1983) «Ой, зялёны дубочак…» (1983) «Браты святой ночы» (1986) «Развітальная песня» (1989) «Сіндыкат Манi Дулi» (1992)
Пасля смерці пісьменніка былі выдадзены зборнікі «Карацелькi» (2011) і «Спецдаручэнец Кныр» (2016).
Крыніцы
Літаратура Ціткоўскі І. А. Мастакі Случчыны. — Слуцк, 2006.
Катэгорыя:Пісьменнікі Беларусі Катэгорыя:Мастакі Беларусі Катэгорыя:Фатографы Беларусі Катэгорыя:Майстры выцінанкі Катэгорыя:Члены Беларускага саюза мастакоў Катэгорыя:Нарадзіліся ў Слуцку Катэгорыя:Нарадзіліся ў 1941 годзе Катэгорыя:Нарадзіліся 17 снежня Катэгорыя:Памерлі ў Мінску Катэгорыя:Памерлі ў 2010 годзе Катэгорыя:Памерлі 10 жніўня Катэгорыя:Члены Беларускага саюза майстроў народнай творчасці