Папскі Грыгарыянскі Універсітэт () — адна са старэйшых рымска-каталіцкіх навучальных устаноў, размешчаная ў Ватыкане. Кіруе Папскім Грыгарыянскім універсітэтам ордэн езуітаў. За дзейнасць універсітэта адказваюць перад рымскай курыяй генерал ордэна езуітаў і прызначаны папам кардынал-пратэктар. Рыхтуе кадры для цэнтральных і перыферыйных царкоўных устаноў.

Гісторыя Заснаваны ў 1551 Ігнаціям Лаёлай і Францыскам Борджа і названы напачатку Scuola di grammatica, d’umanita e dottrina cristiniana («Школа граматыкі, гуманітарных навук і хрысціянскага вучэння»); быў вядомы таксама як Collegium Romanum (Рымскі калегіум). Папам Юліем III пераўтвораны ва ўніверсітэт. Атрымаў падтрымку ад папы Грыгорыя XIII, які ў 1682 годзе выдзеліў яму значную суму з папскай казны і перадаў шэраг будынкаў. У 1926 годзе у склад ўніверсітэта уключаны Вышэйшы інстытут рэлігійнай культуры, у 1928 годзе — Папскі інстытут усходніх даследаванняў (заснаваны ў 1917), у 1955 годзе — Папскі біблейскі інстытут (заснаваны ў 1909).

Структура Грыгарыянскі ўніверсітэт мае факультэты багаслоўя, філасофіі, кананічнага права, гісторыі Цэрквы, місіялогіі, грамадскіх навук; пры ўніверсітэце існуюць інстытуты духоўнага жыцця, псіхалогіі, рэлігійных даследаванняў, астранамічная абсерваторыя, а таксама Вышэйшая школа лацінскай мовы і літаратуры.

Выпускнікі ўніверсітэта Сярод выпускнікоў Грыгарыянскага ўніверсітэта — 20 святых, 29 блажэнных і 14 Рымскіх Пап.

Папы, якія скончылі Грыгарыянскі ўніверсітэт:

Рыгор XV Урбан VIII Інакенцій X Клімент X Інакенцій XII Клімент XI Інакенцій XIII Клімент XII Леў XIII Бенедыкт XV Пій XI Пій XII Павел VI Ян Павел I Нерсес Бедрас XIX — Патрыярх Армянскай каталіцкай царквы.

У Грыгарыянскім універсітэце выкладалі Роберт Белармін, Франсіска Суарес, Габрыэль Васкес і іншыя выбітныя каталіцкія багасловы. Выпускнікамі Грыгарыянскага ўніверсітэта з’яўляюцца шматлікія кардыналы і біскупы.

У Папскім Грыгарыянскім універсітэце ў розны час вучыліся беларускія святары К. Маскалік, А. Надсан, А. Неманцэвіч, Т. Падзява, Я. Рэшаць, Ч. Сіповіч, У. Тарасевіч, Ф. Чарняўскі інш.

У наш час у Грыгарыянскім універсітэце працуюць каля 300 выкладчыкаў і вучацца больш 2,5 тысяч студэнтаў.

Літаратура Папскі Грыгарыянскі універсітэт.

Спасылкі

Афіцыйны сайт Папскага Грыгарыянскага Універсітэта (на італьянскай) Бібліятэка Папскага Грыгарыянскага Універсітэта (спасылка на англійскую старонку Бібліятэкі)

Катэгорыя:Універсітэты Рыма Катэгорыя:Папскія ўніверсітэты Катэгорыя:Ордэн езуітаў