María Pilar Wirtz Molezún, nada na Coruña en 1938, é unha relixiosa católica galega, feminista e docente pertencente á Compañía de María Nosa Señora. Traxectoria Nada na Coruña en 1938, foi filla dun enxeñeiro de ascendencia alemá. Fixo os estudos de Maxisterio en Donostia e a licenciatura de Ciencias Exactas na Universidade Complutense de Madrid. Ingresou na Compañía de María tras facer o noviciado no País Vasco, regresou a Galicia en 1966, destinada como profesora do Colexio Compañía de María de Santiago de Compostela. miniatura|Colexio Compañía de María de Santiago de Compostela, no que traballou Pilar Wirtz En novembro de 1967 foi nomeada directora do Colexio Maior El Pilar, ligado á súa orde relixiosa. Naquela altura, o centro xa acollera varias actividades culturais aperturistas e críticas co franquismo, que continuaron con Pilar Wirtz. Un deses eventos, un coloquio con Xesús Alonso Montero, permitiulle entrar en contacto co galeguismo. Paralelamente, neses anos de renovación interna da Igrexa ao abeiro do Concilio Vaticano II, coñeceu a Andrés Torres Queiruga, cuxas reflexións teolóxicas foron de grande influencia en Pilar Wirtz. Baixo a súa dirección, El Pilar acolleu un concerto de Voces Ceibes, que ocasionou a queixa do reitor da Universidade de Santiago de Compostela, Manuel García Garrido. As presións deste, ameazando con pechar o colexio maior, provocaron que, en 1969, malia a defensa das superiores da Compañía de María, tivese que ser cesada.
O seu compromiso coa renovación teolóxica proseguiu: fomentou que a súa comunidade de relixiosas desenvolvese os seus traballos en contornas socioculturais diversas. Forte defensora dunha Igrexa comprometida coa realidade galega e a súa cultura, formou parte do equipo fundador de Encrucillada, sendo, dende entón, membro do consello de redacción. Asumiu responsabilidades dentro da Compañía de María en Galicia, primeiro dentro do equipo provincial entre 1977 e 1984, e logo, como Provincial, é dicir, cordinadora da orde en Galicia entre 1985 e 1994; tamén foi presidenta de CONFER de Galicia (agrupación de relixiosos e relixiosas católicas galegas). Dende a década de 1990, Wirtz, destacouse na reivindicación do papel da muller dentro da Igrexa e participou no artellamento de dúas asociacións referentes: a Rede Miriam de Espritualidade Ignaciana Feminina (1990) e a Asociación de Mulleres Cristiás Galegas Exeria (1996).
Obras É autora de decenas de artigos sobre teoloxía e participou en diversasobras colectivas:
Donas da nosa memoria (Concello de Santiago de Compostela, 2007).
Regalos del espíritu para un mundo con prisas (Desclée de Brouwer, 2009) Engracia Vidal Estévez, profecía de fe e galeguidade (Asociación de Mulleres Cristiás Galegas Exeria, 2010) As mulleres falamos de teoloxía: espazo de teoloxía feminista (Asociación de Mulleres Cristiás Galegas Exeria, 2012)
Notas
Véxase tamén Ligazóns externas Páxina da Asociación de Mulleres Cristiás Galegas Exeria Páxina de Encrucillada: revista de pensamento cristián
Categoría:Relixiosos católicos Categoría:Feministas de Galicia Categoría:Profesores de educación secundaria
Categoría:Nados na Coruña
Categoría:Nados en 1938 Categoría:Personalidades de Galicia sen imaxes Categoría:Compañía de María Nosa Señora