O dólar de Terra Nova foi a moeda da colonia e do dominio de Terra Nova desde 1865 ata 1949, cando este territorio pasou a se converter nunha das provincias do Canadá e asumiu o dólar canadense como unidade monetaria.

O dólar de Terra Nova dividíase en 100 centavos (cents).

Historia En 1865, Terra Nova acolleuse ao padrón ouro e o dólar pasou a substituír a libra esterlina, cun tipo de cambio de 1 dólar = 4 xilins e 2 peniques ou, o que é o mesmo, 1 libra = 4,80 dólares. Este tipo de cambio era lixeiramente superior ao do dólar canadense, que valía 0,7 peniques menos. Deste xeito, dous centavos de dólar equivalerían a un penique esterlino.

Tratábase dun tipo de cambio de compromiso entre as opcións de adoptar directamente o sistema británico ou o do dólar estadounidense, e tamén tivo o efecto de aliñar a nova unidade de Terra Nova co dólar das colonias británicas do Caribe Oriental Británico.

Terra Nova foi o único territorio do Imperio Británico que introduciu a súa propia moeda de ouro logo de se acoller ao padrón ouro. As moedas de dous dólares de ouro terranovenses emitíronse intermitentemente ata a crise bancaria de Terra Nova de 1894."Newfoundland, two dollars". Coinsandcanada.com. 29 de marzo de 2004. O ano seguinte, os bancos canadenses trasladáronse a Terra Nova e o valor do dólar terranovense axustouse para o igualar ao do dólar canadense, mediante unha desvalorización do 1,4 %.

Finalmente, o dólar de Terra Nova foi substituído á par polo dólar canadense cando en 1949 se constituíu como unha provincia do Canadá."Currency". En Smallwood, J. R. ; Roberts, J. (1981). Páxinas 575-577.

Moedas

En 1865 púxose en circulación unha primeira serie de moedas composta polos valores dun centavo (cobre), 5, 10 e 20 centavos (prata) e dous dólares (ouro). En 1870 introduciuse a moeda de prata de 50 centavos (medio dólar) e en 1917 substituíuse a moeda de 20 centavos por unha nova, tamén de prata, con valor de 25 centavos. Finalmente, en 1938 substituíuse a moeda de cobre dun céntimo por outra cuñada no mesmo metal mais cun tamaño inferior."Coins from Newfoundland. Dollar (1865-1949)". Numista.com

Billetes Ao tempo que se introducían as primeiras moedas, autorizábase o Commercial Bank of Newfoundland para facer unha primeira emisión de billetes, en 1874, co valor facial expresado en libras esterlinas e dólares, utilizando un tipo de cambio de 4 dólares = 1 libra. Tendo en conta que este cambio coincidía co do dólar canadense da época, parece posible que esta primeira serie de billetes non estivese destinada á súa posta en circulación como "dólares de Terra Nova"."Newfoundland". Banknote.ws

Na década de 1880, tanto o Commercial Bank como o Union Bank of Newfoundland emitiron novas series de billetes co seu valor facial xa expresado unicamente en dólares, compostas polos valores de 2, 5, 10, 20 e 50 dólares. Estes dous bancos crebaron por mor da crise de 1894.

Xa no século XX, o Departamento de Obras Públicas puxo en circulación en 1901 billetes gobernamentais con valores de 40, 50 e 80 centavos, e de un e cinco dólares, aos que en 1910 se lles engadiron os billetes de 25 centavos e de 2 dólares. Finalmente, en 1920 o Tesouro introduciu novos billetes dun e de dous dólares.

Padrón ouro Desde 1895, o dólar de Terra Nova estivo vinculado ao dólar canadense e seguiu a ser convertible en ouro mesmo despois de que o Canadá saíse do padrón ouro en 1931. Como consecuencia da saída do padrón ouro e da situación económica da Depresión, o dólar canadense sufriu unha caída con respecto ao dólar estadounidense, o que abriu a oportunidade dun mercado de arbitraxe unidireccional cos Estados Unidos. Resultou rendible, daquela, converter os dólares canadenses en ouro en Terra Nova e logo levar o ouro aos Estados Unidos para o vender alí con beneficios. Isto supuxo unha presión económica para Terra Nova, xa que as súas reservas de ouro comezaron a diminuír.Hiller, J.; Harrington, M. (eds.). The Newfoundland National Convention, 1946-1948. Volume two: reports and papers. Memorial University of Newfoundland. Páxina 377. ISBN 0 7735 1246 2

En decembro de 1931, o Goberno de Terra Nova sacou o país do padrón ouro, case un ano despois de que o fixera o Canadá. Seguidamente, na primavera de 1932, promulgouse unha nova lei pola que se modificaba a Lei da Moeda, para prohibir a exportación de ouro sen permiso. Os billetes pasaron entón a ser simplemente de curso legal, mais perderon a súa condición de seren convertibles en ouro.An Act to make Provision for controlling the Export of Gold and for controlling the Currency. Statutes of Newfoundland. 1932. c. 1.

Notas

Véxase tamén

Bibliografía

Berman, A. G. (2008). Warman's Coins And Paper Money: Identification and Price Guide (4 ed.). Krause Publications. ISBN 978-0-89689-683-3 Cross, W. K. (2005). Charlton Standard Catalogue. Canadian Coins (59ª ed.). Charton Press. ISBN 978-0889682887 Cuhaj, G. S. (ed.) (2012). Canadian Coin Digest (2ª ed.). Krause Publications. ISBN 978-1-4402-2985-5 Haxby, J. A.; Willey, R. C. (1998). Coins of Canada (16ª ed.). The Unitrade Press. ISBN 978-1895909616 Krause, C. L.; Mishler, C. (1991). Standard Catalog of World Coins: 1801-1991 (18th ed.). Krause Publications. ISBN 0873411501 Pick, A. (1994). Standard Catalog of World Paper Money: General Issues (7th ed.). Krause Publications. ISBN 0-87341-207-9 Pick, A. (1990). Standard Catalog of World Paper Money: Specialized Issues (6th ed.). Krause Publications. ISBN 0-87341-149-8 Smallwood, J. R.; Roberts, J. (1981). Encyclopedia of Newfoundland and Labrador. Volume 1. Newfoundland Book Publishers, St. John's.

Categoría:Dólar Categoría:Moedas do Canadá Categoría:Moedas fóra de curso Categoría:Billetes