Josefina Romo Arregui, nada en Madrid o 27 de maio de 1909 e finada na mesma cidade o 3 de decembro de 1979, foi unha poeta, docente, investigadora e crítica literaria española do século XX.
Traxectoria Estudou o Bacharelato e o doutoramento de Filosofía e Letras en Madrid. Ampliou os seus estudos en Bordeos e foi pensionada por varias cidades de Europa. Na universidade fíxose amiga de Alfonsa de la Torre, de quen prologou o seu libro Égloga, en 1943.
Licenciouse e doutorouse con Premio Extraordinario na Facultade de Filosofía e Letras da Universidade Central de Madrid, coa súa tese Núñez de Arce. En 1947 foi catedrática adxunta de Lingua e Literatura españolas e de Literatura hispanoamericana na Universidade de Madrid e encargada do curso de Literatura Universal. Foron alumnos seus Xesús Alonso Montero, Carlos Bousoño, Alfonso Sastre, Alfonso Paso, Fernando Lázaro Carreter e Concha Zardoya, entre outros. Polas tardes traballou no Consello Superior de Investigacións Científicas como bolseira.
Fundou a revista Alma, xunto a Miguel Ángel de Argumosa e editou Cuadernos Literarios (1942-1952). Foi encargada da colección de poesía fundada por Carmen Conde. No seu labor como poeta recitou poemas nas sesións de «Alforjas para la poesía española» que se celebraron no Teatro Lara en 1948 xunto a outras poetas como Josefina de la Torre, Alfonsa de la Torre e Dolores Catarineu, entre outras.
En 1958 emigrou a Nova York alentada por Diana Ramírez de Arellano, que fora alumna súa. Ensinou Literatura española e hispanoamericana no City College da Universidade de Nova York e, a partir de 1963, na Universidade do Estado de Connecticut. Tamén foi membro do Centro de Estudos sobre Lope de Vega da Hispanic Society, conselleira da Revista Interamericana, asesora literaria da Asociación Portorriqueña de Escritores e Presidenta Honoraria do Ateneo Portorriqueño de Nova York.
En 1978 regresou a España gravemente enferma, onde alternou estancias en Villanueva del Pardillo e Mirasierra. Morreu un ano despois. Os seus restos descansan no camposanto de Villanueva del Pardillo.
Obra Escribiu poemarios e traballos de investigación. Cultivou unha poesía de corte tradicional, afastada da vangarda, tanto no formal (métrica e estrofas) como no contido, tendente ao ton relixioso sen incorrer nunha pretensión moralizante. Aparece na antoloxía de Carmen Conde de 1954 Poesía feminina española vivente.
Poemarios
1932 La peregrinación inmóvil 1950 Cántico de María Sola, 1946-1948 1955 Isla sin tierra: poema 1964 Elegías desde la orilla del triunfo 1968 Poemas de América 1968 Auto Antología
Traballos de investigación
1944 Cuentistas españoles de hoy 1946 Vida, poesía y estilo de D. Gaspar Núñez de Arce 1979 Poetas románticos desconocidos: Concepción de Estevarena, 1854-1876
Recoñecementos No número 14 da rúa Arrieta de Madrid hai unha placa colocada pola Casa de Porto Rico en España no segundo aniversario da súa morte.
Viviu nesa casa antes de trasladarse a Nova York.
En 2020 a cantante, compositora e pianista Sheila Blanco lanzou o seu álbum de poesía musicalizada Cantando a las poetas del 27 no que fai unha homenaxe á poeta incluíndo o poema «Pétalos, Quiero besarte la risa».
En novembro de 2023, tras un longo período de investigación, a Asociación cultural Memorare homenaxeou a poeta no Centro Cultural Tamara Rojo de Villanueva del Pardillo e iniciou un proceso de difusión e posta en valor da súa obra. Na devandita homenaxe, en colaboración co Concello da localidade, participou, entre outras personalidades, Margarita Bru Romo, sobriña da poeta.
Ese mesmo ano as editoriais Alba e Torremozas publicaron parte das obras de Josefina Romo Arregui.
Notas
Categoría:Nados en Madrid Categoría:Finados en 1979 Categoría:Nados en 1909 Categoría:Poetas de España Categoría:Alumnos da Universidade Central de Madrid Categoría:Profesores da Universidade Central de Madrid Categoría:Profesores da Universidade de Nova York