Bieito Ledo Cabido, nado no lugar de Padroso (Xunqueira de Ambía) o 23 de febreiro de 1944, é un escritor e editor galego. Na actualidade é director de Ir Indo Edicións.
Traxectoria Estudou filosofía e teoloxía no seminario de Ourense, acadando a licenciatura en Filosofía pola Universidade Complutense de Madrid. Impartiu clases como profesor no ensino privado.
En 1975 trasladouse a Vigo, onde fundou a librería Ir Indo, e en 1979 incorporouse á Editorial Galaxia como director-xerente ata 1985. Posteriormente, ingresou no concello de Vigo, onde desempeñou o cargo de xefe de Cultura e Educación. En 1978, como presidente do Círculo Ourensán-Vigués, fundou os Premios da Crítica Galicia que presidiu durante quince anos, para logo constituír a fundación homónima, da que é presidente.
En 1985 fundou en Vigo Ir Indo Edicións, coa que creou os proxectos da Enciclopedia Galega Universal (EGU, 1999), o Diccionario Enciclopédico Galego Universal (DEGU, 2003) e o Dicionario biográfico de Galicia (2010-2011).
Foi membro fundador e primeiro presidente da Asociación Galega de Editores, membro fundador da Fundación Galicia-Empresa, membro do padroado da Fundación Otero Pedrayo, e membro da Asociación de Amigos do Couto Mixto, entre outras asociacións. En nome da EGU, recibiu o Premio da Crítica Galicia como mellor Iniciativa Cultural en 2001 e o Trofeo Galeguidade no apartado de Medios de Comunicación Social da Enxebre Orde da Vieira en 2003. No ano 2005 o concello de Vigo nomeouno Vigués Distinguido e no 2006 o concello de Xunqueira de Ambía concédelle a distinción de Fillo Predilecto. Nese mesmo ano publicou o libro de relatos curtos Aconteceres.
Obras Narrativa Aconteceres. (Ir Indo, 2006).ISBN 84-7680-591-8 Cavilacións. (Ir Indo, 2018).ISBN 978-84-7680-741-5 O meu reloxo. (Ir Indo, 2014). Traducido ó castelán e o inglés. ISBN 978-84-7680-715-6
Premios e recoñecementos Premio da Crítica Galicia, no ano 2001. Trofeo Galeguidade da Enxebre Orde da Vieira, no 2003. Vigués Distinguido, no 2005. Fillo Predilecto do concello de Xunqueira de Ambía, no 2006. Premio Celanova Casa dos Poetas, no ano 2024. Premio Insua dos Poetas 2026 en Cultura.
Notas
Véxase tamén Ligazóns externas Ficha en www.culturagalega.org
Categoría:Escritores de Galicia Categoría:Editores de Galicia Categoría:Escritores en lingua galega Categoría:Nados en Xunqueira de Ambía Categoría:Ir Indo Categoría:Nados en 1944 Categoría:Vigueses distinguidos