Stéphane Michel Jean Pacewicz Durand, nado en Chateau-Gontier, Francia, o 19 de outubro de 1843 e finado en Vigo o 2 de febreiro de 1921, foi un arquitecto francés de orixe polonesa. Desenvolveu os seus últimos 17 anos de actividade profesional en Vigo, onde deseñou algúns dos edificios máis representativos da cidade.
Traxectoria En 1860 inicia os seus estudos de arquitectura formándose co profesional parisiense Paul Abadie, para logo traballar con Louis Jules Bouchot. Posteriormente, no ano 1872, coñece ao potentado vigués Benito Sanjurjo, que por aquel entón residía en París, e a través del entra en contacto coa burguesía viguesa do momento. Pero non sería ata o 1904 cando Pacewicz, con xa 61 anos, decide instalarse en Vigo coa súa dona e desenvolver na cidade olívica o seu labor profesional, malia que xa dende o 1897 levaba deseñando edificios pensados para aquela.
Obra O estilo das construcións de Pacewicz é o eclecticismo, con algunhas mostras de neomedievalismo. Velaquí algúns dos seus edificios máis representativos: Casa para Joaquín Acuña Soaje (1897), na rúa Policarpo Sanz esquina Velázquez Moreno. Edificio El Moderno (1897). Deseñado por Pacewicz cando aínda vivía en Francia. Hotel dende 1906, posteriormente reformado por Desiderio Pernas, situado na rúa de Policarpo Sanz.Edificio El Moderno na páxina do Concello de Vigo.
Escola de Artes e Oficios (1897). Ao igual que a anterior tamén a proxectou en Francia. Localízase na esquina da avenida de García Barbón coa rúa Pontevedra.Escola de Artes e Oficios na páxina do Concello de Vigo. Casa para Salvador Aranda Graña (1898), na rúa Concepción Arenal n.º 1. Casa Yáñez (1900). Edificio situado na Praza de Compostela esquina coa rúa Velázquez Moreno, é, xunto coa Escola, un exemplo da súa arquitectura neomedievalista. Chalé ou Casa de Rosendo Silva (1900), na rúa López Mora. Casa de Enrique Lagos (1901) na Rúa Policarpo Sanz n.º 19. Casas para Benito Sanjurjo Ramírez de Arellano (1903-1912), do número 11 ao número 23 da Rúa de Urzáiz.Grupo de Casas de Benito Sanjurjo en Turgalicia. Casas de Oya (1904), na avenida de García Barbón esquina Rúa República Arxentina, sede do Hotel NH Palacio de Vigo****.Casas de Oya na páxina do Concello de Vigo. Casa para Ángel Núñez Berdiales (1904) na Rúa Urzáiz 42, esquina Rúa Hernán Cortés. Casa para Benito Sanjurjo (1906), no número 20 da Praza de Compostela. Casa para Rosendo Silva (1907) en colaboración con Jenaro de la Fuente Domínguez, na P.ª de Compostela 19, esquina r/ Concepción Arenal.Casa Rosendo Silva en Turgalicia.
Galería de imaxes
Notas
Véxase tamén
Bibliografía
: "PACEWICZ, Michel" en Gran Enciclopedia Galega Silverio Cañada. (2000): Arquitectura da pedra en Vigo. Produción Galaxia, edición Construcciones Conde, Vigo. ISBN 84-605-9897-7.
Ligazóns externas arquitecturavigo.blogspot.com.es