L'ortografia genovesa, doperada anca per scriv giò in di alter variant del Ligur, la gh'ha i istess fondament de quella piemontesa e de quella milanesa; compagna de quei là, la gh'ha la soa ispirazion de la litteradura local, che poeu col temp l'ha mudaa on quai di sò aspett e caratteristigh. I letter A: compagna de la a lombarda, anca se la gh'ha on sonn pussee fosch. Æ: compagn de ona e averta, come 'l ai in del frances maître o i vari ä/è/ê di ortografii emiliann. L'è quasi semper tonigh. B: compagna de la b lombarda. C: compagna de la c lombarda. Ç: compagna de la s lombarda de saltà. D: compagna de la d lombarda. E: compagna de la e lombarda. EU: compagn del trittongh lombard oeu. L'è semper tonigh (proppi 'me in lombard occidental). F: compagna de la f lombarda. G: compagna de la g lombarda. H: compagna de la h lombarda (però el se dopera minga in de la coniugazion del verb avèggh). I: compagna de la i lombarda. J: compagna de la j lombarda. L: compagna de la l lombarda. M: compagna de la m lombarda. N: compagna de la n lombarda. N-: compagna de la n- piemontesa, cioè ona specie de ng, tipigh anca de on quai dialett lombard settentrional. O: compagna de la o milanesa. Ò: compagna de la ò milanesa. P: compagna de la p lombarda. Q: compagna de la q lombarda. R: compagna de la r lombarda. S: compagna de la s lombarda aspra (cioè quella de saa, stupid...). S-C: compagna del s'c lombard. T: compagna de la t lombarda. U: compagna de la u lombarda, foeura che in d'on quai dittongh (come òu, che l'è pronunciaa 'me ona O streggia pù ona /w/ italiana) V: compagna de la v lombarda. X: compagna de la x veneziana, o anca de la z/ş/ś di vari ortografii emiliann. Z: compagna de la z milanesa de Gorgonzoeula o de la s de roeusa. L'accent L'accent in genoves el pò vess de quatter speci: sguzz, grav, circonfless o la dieresi. I accent sguzz e grav, semper mettuu in posizion toniga, serven a fà capì mej come l'è che se pronuncia ona e o 'na o (on poo 'me in certi variant de l'ortografia milanesa): L'accent circonfless el serviss a marcà ona vocal longa. La dieresi l'è doperada domà per la Ò (cioè ö) e la serviss per fàlla vegnì longa e averta (compagna de quella del lombard port). Quest perchè la Ô la serviss per slongà la vocal O. A dìlla tutta, l'unigh cas in del qual l'accent l'è proppi obbligatori l'è se la parolla l'è tronca. Alter robb Compagna de l'ortografia milanesa, anca quella genovesa la dopera i consonant doppi. El trattin /-/ el ven doperaa per separà ona quai robba, come la preposizion articolada a-o (cioè "al"). On temp la vegniva scritta ona R che adess la se sent pù. Donca a gh'avevom: Articol determinativ: ro, ra, ri, re (al dì d'incoeu: o, a, i, e). Cristofen Colombo: Cristòffa Coronbo (al dì d'incoeu: Cristòffa Cônbo).
Vos correlaa Ortografia milanesa classiga Ortografia piemontesa Ligamm de foeura Grafîa ofiçiâ de l'Académia Ligùstica do Brénno Come se scriv in lengua genovesa
Categoria:Lengua ligur