La roeuda la gira l'è ona canzon tradizzional in lombard. La canta la storia de on moletta, che 'l va in gir per fà el sò mestee, tant 'me la roeuda che 'l dopera per molà. El test Oj donn, gh'è chì el moletta, se gh'avii on cortell coi dent, se gh'avii la forbesetta che taja pu nient, cortell e forbesetta, oj donn, portemmei chì: no gh'è nissun moletta che 'l mola mej de mì!
E gira, la roeuda la gira, e la gira, la roeuda la va: Gira gira, Gioann, che ven sira, ma la roeuda la stenta a girà!
L'è on pezz che foo girà 'sta roeuda inanz e indree ma mai podaroo vanzà cinch ghei de 'sto mestee: l'è inutel pensàggh sora l'è inscì che la gh'ha de andà, 'sta roeuda sott e sora mì gh'hoo de fà girà!
E gira, la roeuda la gira, e la gira, la roeuda la va: Gira gira, Gioann, che ven sira, ma la roeuda la stenta a girà!
Lassemm che 'l mond el gira e gira anca la luna comè i tosann de sira in circa de fortuna; e mì col mè carrett voo in gir de chì e de là: oj donn, gh'è chì el moletta se gh'avii de fà molà!
E gira, la roeuda la gira, e la gira, la roeuda la va: Gira gira, Gioann, che ven sira, ma la roeuda la stenta a girà! Categoria:Canzon in lombard