Bari (Bàre in del dialet local) a l'è una cità de la Puja, caploeugh de la cità metropolitana omonema e de la region intrega. El gh'ha circa 316'015 abitant, una superfiss de 116 km² e una densità de popolazzion de 2692 ab/km². El confina coi comun de Adelfia, Bitonto, Bitritto, Capurso, Giovinazzo, Modugno, Mola di Bari, Noicattaro, Triggiano e Valenzano.
Center mediterrani, l'è caraterizad de un center storegh bell vegg, con vari element bizantin, e pien de gese, 'me el Dom e la Basilega de San Nicola, ma anca de sit storgeh 'me el Castell normand-svev, cont un slargàss che gh'è stad a partì del secol XIX, cont el fà su del quarter de Murat e che l'ha vist el desvilup de vari quarter pussee moderni.
La cità la gh'ha un port, un reoport, una stazzion di treni a longa percorrenza e vari servizzi ferroviari local, el pussee important quell metropolitan, ma gh'è anca quei di ferrovie Appulo-Lucane che conlighen la cità a Matera, oltra a una red de bus gestida de vari operador tant 'me AMTAB e Ferrovie del Sud Est.
Bari l'è ben cognossud anca per la soa cusina, con piat compagn di panzerot, di spaghet a l'assassina, di cartellate, di tarai e di scagliozzi. A nivell de coltura gh'è vari musee, tant 'me quell de Santa Scolastega, el Musee nicolaian e la Pinacoteca de Bari, gh'è anca vari teater tant 'me el Margherita e 'l Petruzzelli.
Galleria di foto
Ligam de foeura Sit ofizzial
Alter proget