мини|Иван В’лков Иван В’лков В’лков (31 јануари 1875, Казанлак — 20 април 1962, Стара Загора) бил бугарски генерал од пешадијата, военополитички дејец и дипломат. Во периодот 1923–1929 година бил министер за војна на Бугарија, а од 1929 до 1934 година бил бугарски ополномоштен министер во Италија.
Биографија В’лков во 1896 година го завршил Военото училиште во Софија, а потоа се специјализирал во областа на артилеријата, геодезијата и воената топографија во Санкт Петербург. Во 1904 година ја завршил Михајловската артилериска академија, а во 1909 година Николаевската генералштабна академија. Практична обука по астрономија и геодезија стекнал во Пулковската опсерваторија. По враќањето во Бугарија предавал воено-топографски предмети и учествувал во развојот на воената картографија. Во 1919 година бил поставен за прв директор на Географскиот институт при Штабот на бугарската армија.
Учествувал во Балканските војни, а за време на Првата светска војна служел во штабот на Втора бугарска армија, командувал со 44-тиот пешадиски полк и бил началник на штаб на 7-та и 10-та пешадиска дивизија. По војната бил еден од основачите на Воениот сојуз и негов претседател во периодот 1920–1928 година.
В’лков бил активен учесник во Деветојунскиот преврат во 1923 година, по кој бил назначен за министер за војна. За време на неговиот мандат бугарските власти спровеле остри репресии против левичарските политички сили, особено по Септемвриското востание во 1923 година и атентатот во црквата „Света Недела“ во 1925 година.
Во 1929 година бил испратен како ополномоштен министер на Бугарија во Италија, каде што останал до 1934 година. Во дипломатската служба, меѓу другото, учествувал во преговорите поврзани со бракот на бугарскиот цар Борис III со италијанската принцеза Џована Савојска.
По Деветосептемврискиот преврат во 1944 година бил уапсен. Во 1954 година бил осуден на смрт во процес поврзан со репресиите од 1920-тите, но поради напредната возраст казната му била заменета со 20 години затвор. Умрел во затворот во Стара Загора на 20 април 1962 година.
Категорија:Бугарски генерали