Море на Работ (латински: Mare Marginis) — месечево море кое лежи на самиот раб од блиската страна на Месечината.
Ова месечево море се разликува од повеќето други блиски месечеви мориња; има неправилни контури и релативно тенок слој. На рамнината на морето се забележуваат мали кружни и издолжени структури, кои веројатно претставуваат ударни кратери затрупани со околу 300 до 500 метри лава. Море на Работ не е поврзано со јасен и голем ударен слив. Наместо тоа, претставува пониско подрачје во кое месечевата лава успеала да избие на површината.
Во близина се наоѓаат и неколку големи кратери чии дна се исполнети со истата темна лава. Бидејќи дното на овие кратери се наоѓа под нивото на околниот планински терен, тоа укажува дека лавата на овие места се наоѓала релативно блиску до површината на Месечината.
Главниот кратер северно од Море на Работ е Ал-Бируни. Кратерот Ибн Јунус се наоѓа југоисточно од морето, додека Годард се наоѓа северозападно од него.
На површината на ова месечево море се забележуваат месечеви вртлози. Подрачјата со повисоко албедо наликуваат на Рајнеровата гама во Океанот на Бурите. Оваа карактеристика е поврзана со релативно силно магнетно поле. Таа се наоѓа и на антиподната страна на ударниот слив Источно Море, па можно е нејзиното формирање да е поврзано со настанокот на овој слив.
Меѓу другите предложени објаснувања за формирањето на овие вртлози се удар од комета, ослободување на вулкански гасови и заштита на површината од вселенското зрачење и наелектризираните честички од сончевиот ветер под влијание на магнетното поле. Сепак, точната причина за создавањето на овие карактеристики на албедото сè уште не е целосно разјаснета.
Наводи
Литература Пол Д. Спадис, Некогашната и идната Месечина, Смитсонијан Институшн Прес, 1996 , . Категорија:Месечеви мориња Категорија:Четириаголник LQ13 Категорија:Координати на Википодатоците Категорија:Краток опис различен од Википодатоците Категорија:Статии со краток опис