Ванѓа Чашуле ( во — во ) — македонски преведувач, историчар и публицист, како и учесник во НОБ и носител на Партизанска споменица 1941.
Животопис Ванѓа Чашуле (моминско презиме: Стевчева) била родена на 9 август 1923 година во Радовиш. На 11-годишна возраст, таа добила стипендија за школување во Белград, а по завршувањето на учителската школа, таа се вратила во Вардарска Македонија.
Во 1941 година, таа се вклучила во движењето на отпорот како курир, пренесувајќи важни документи. Исто така, учествувала во подготовките за атентатот на озлогласениот Мане Мачков (инаку, нејзин братучед) по што била уапсена и осудена на доживотен затвор во Стара Загора, каде што била изложена на невидено мачење, но не ги предала своите соборци. За своето учество во НОБ, таа била одликувана со признанието Партизанска споменица 1941."Белешка за преведувачот", во: Антoлогија на бразилскиот расказ, Три, Скопје, 2012, стр. 291.
По ослободувањето на Македонија, таа работела како уредник во културната рубрика на весникот „Нова Македонија“. Во 1961 година, веќе мајка на четири деца, дипломирала со највисок успех на Филозофскиот факултет во Скопје, на групата по историја, по што ја започнала кариерата на еден од највидните македонски историчари. Во средината на 1960-тите, Ванѓа Чашуле го основала Отсекот за односи со странство, каде што работела до пензионирањето во 1970 година. Ванѓа Чашуле починала на 18 јули 1986 година во Скопје и со високи почести била погребана на гробиштата Бутел, во Алејата на великаните."Белешка за преведувачот", во: Антoлогија на бразилскиот расказ, Три, Скопје, 2012, стр. 291-292.
Творештво По завршувањето на Филозофскиот факултет во Скопје, Ванѓа Чашуле започанала да е занимава со истражување на македонската историја и за брзо време станала еден од највидните македонски историчари. Во 1965 година, таа напишала обемна биографија на Гоце Делчев под наслов "Гоце Делчев - идеолог и организатор на македонското национално-ослободително движење", која била објавена на македонски, српскохрватски и словенечки јазик. Во 1970 година, Ванѓа Чашуле го објавила своето капитално дело "Од признавање до негирање", во кое го обработува дволичниот однос на Бугарија кон македонското прашање. За ова дело, таа ги добила највисоките државни награди, а делото било преведено на пет странски јазици.
По пензионирањето, таа се посветила на преведување од шпански и португалски јазик. Најзначаните преводи на Ванѓа Чашуле ги вклучуваат:"Белешка за преведувачот", во: Антoлогија на бразилскиот расказ, Три, Скопје, 2012, стр. 292. "Сто години самотија" од Габриел Гарсија Маркез, "На полковникот нема кој да му пишува" од Габриел Гарсија Маркез, "Хроника на една најавена смрт" од Габриел Гарсија Маркез, "Пантелеон и посетителките" од Марио Варгас Љоса, "Сув живот" од Грасилијано Рамос, "Умирачката и смртта на Кинкас рикачот за вода" од Жорже Амадо.
Во чест на нејзиното дело како преведувач, воспоставена е награда за литературен превод „Ванѓа Чашуле“, која е доделувана еднаш годишно за најуспешен превод на странско дело на македонски јазик.
Наводи
Категорија:Родени на 9 август Категорија:Починати на 18 јули Категорија:Луѓе од Радовиш Категорија:Починати во Скопје Категорија:Македонски историчари Категорија:Македонски преведувачи Категорија:Македонски публицисти Категорија:Југословенски историчари Категорија:Југословенски преведувачи Категорија:Југословенски публицисти Категорија:Учесници во НОБ Категорија:Носители на Партизанска споменица од 1941 Категорија:Апсолвенти на Филозофскиот факултет - Скопје Категорија:Затвореници во Бугарија