Vitengarden er eit kombinert museum og vitensenter som ligg på Kvia, ved tettstaden Nærbø, i Hå kommune. Anlegget opna som museum i 1995, og har sidan 2002 vore ei avdeling i Jærmuseet.
Anlegget har eit samla bygningsareal på vel 4 000 kvadratmeter. Museumsbygningane og museumstomta representerer skjeringspunktet mellom tradisjon og nyskaping. Bygningane ligg i eit gammalt jordbrukslandskap som ennå ber preg av det gamle Jæren. Inne i utstillingsbygget er det moderne vitensenterutstillingar. Vitengarden baserer formidlinga si på interaktive metodar og prinsippet om å «læra ved å gjera.» Hovudtema for Vitengarden er naturvitskap, landbruk, teknologi og matproduksjon.
Utstillingar og formidling Formidlinga ved senteret dekker særleg verdikjeda for mat, i tillegg til mekaniske og biologiske prinsipp med utstillingar som «Jæren blir til», «PELS», «Byggeskikk» og «Men mat må me ha...»
Museumsgarden Til Vitengarden ligg Kvia 4H- og museumsgard. Dette er eit gardstun opphavleg frå 1878, som i dag er innretta som eit gardsmiljø frå 1950-åra. Museumsgarden viser det historiske dyrehaldet på Jæren og vert nytta til å demonstrere tradisjonelt landbruk og matlaging. Senteret arrangerer sesongbaserte aktivitetar knytte til tradisjonelle gjeremål i landbruket, slik som potetsetting om våren, potetopptaking, saueklipping og slakting om hausten.
Kjelder
Sjå Jæren 2010, årbok for Jærmuseet (Jærmuseet, Nærbø 2010).
Bakgrunnsstoff
Kategori:Museum i Rogaland Kategori:Hå kommune Kategori:Skipingar i 1995