SS «Normandie» var eit fransk passasjerskip som vart bygd av Chantiers de Penhoët i Saint-Nazaire i Frankrike, for det franske reiarlaget Compagnie Générale Transatlantique (CGT, òg kjent som French Line). Skipet vart sett inn i teneste i transatlantisk drift i 1935, som det største og raskaste passasjerskipet i verda.
Art deco-designen og det overdådige interiøret har fått mange til å vurdera skipet som det fremste av alle passasjerskip gjennom tidene. Trass dette var det ikkje ein kommersiell suksess, og var avhengig av statlege tilskot. Under teneste som flaggskip for CGT, gjennomførte «Normandie» 139 vestgåande transatlantiske krysningar frå heimehamna si i Le Havre til New York. «Normandie» vann Atlanterhavets blå band for den raskaste transatlantiske overfarten fleire gonger. RMS «Queen Mary» frå 1936 var den største rivalen.
Under den andre verdskrigen vart «Normandie» beslaglagt av amerikanske styresmakter i New York og omdøypt til USS «Lafayette». I 1942 tok skipet fyr medan det var under ombygging til troppetransportskip. Det kantra mot babord og vart liggjande i Hudsonelva ved Pir 88, staden for den noverande passasjerskipsterminalen i New York; «New York Passenger Ship Terminal». På grunn av store kostnader vart restaurering sett på sin urealistisk, og skipet vart difor selt for opphogging i oktober 1946.
Kjelder
Denne artikkelen bygger på «SS «Normandie»» frå , den 4. november 2018.
Bakgrunnsstoff SS Normandie - Monsters of the Sea: The Great Ocean Liners of Time S.S. Normandie - Great Ships The Sinking of the S.S. Normandie At NYC's Pier 88
Kategori:Dampskip Kategori:Sjøfart i Frankrike Kategori:Passasjerskip Kategori:Skip frå 1935