Dactylorhiza majalis ssp. traunsteinerioides er ei plante i marihandslekta Dactylorhiza i orkidéfamilien (marihandfamilien) Orchidaceae.
Systematikk Dactylorhiza majalis ssp. traunsteinerioides høyrer til kongsmarihand-gruppa D. majalis. Heile gruppa er tetraploid og har truleg kome til ved hybridisering mellom dei to diploide plantene engmarihand (D. incarnata) og skogmarihand (D. maculata ssp. fuchsii), kopla med dobling av kromosomtalet.
På dei britiske øyane er denne planta (engelsk namn Pugsley's marsh orchid) klassifisert som ein art, Dactylorhiza traunsteinerioides (tidlegare rekna til Dactylorhiza traunsteineri, som har synt seg å vere ein reint mellomeuropeisk art). I Skottland har ein tidlegare rekna med ein underart D. t. ssp. lapponica (engelsk namn Lapland marsh orchid), som ikkje er identisk med vår lappmarihand. Desse plantene blir no rekna som ein varietet, var. lapponica.
I Storbritannia har ein tradisjonelt rekna planter på Hebridane (engelsk namn Hebridian marsh orchid) som eit eige taxon endemisk for området, anten som varietet (Dactylorhiza majalis ssp. occidentalis var. ebudensis), underart (Dactylorhiza occidentalis ssp. ebudensis) eller art (Dactylorhiza ebudensis). I den siste utgåva av New Flora of the British Isles (2019) var taxonet innlemma i D. traunsteinerioides, men ved raudlistevurderinga i 2021 valde ein førebels å halde fast på dei to artsnamna.
I Plants of the World Online har ein på grunnlag av ein artikkel i Kew Bulletin frå 2023 omdefinert systematikken, løfta underarten ut av D. majalis-komplekset og innført ein ny taksonnamn på artsnivå, Dactylorhiza francis-drucei. Andre takson i gruppa har då òg blitt omdefinert. D. francis-drucei har desse undertaksona: Dactylorhiza francis-drucei var. ebudensis (Wief. ex R.M.Bateman & Denholm) R.M.Bateman & Denholm: tidlegare D. majalis ssp. occidentalis var. ebudensis eller D. ebudensis Dactylorhiza francis-drucei subsp. francis-drucei Dactylorhiza francis-drucei subsp. traunsteinerioides (Pugsley) R.M.Bateman & Denholm: tidlegare D. majalis ssp. traunsteinerioides
Utbreiing Dactylorhiza majalis ssp. traunsteinerioides er rekna for å vere endemisk for Dei britiske øyane. Det er likevel mogleg at ein populasjon på flyplassområdet på Sola, kalla solamarihand, høyrer til denne underarten.
På Dei britiske øyane er Dactylorhiza traunsteinerioides rekna som livskraftig (LC) i både den britiske og den irske raudlista, på same måte som lokalt i England og Wales, og han er ikkje nemnd for tiltak i Skottland.
Dactylorhiza ebudensis er rekna som sårbar (VU) i den britiske raudlista og lokalt i Skottland.
Hybridar Hybridar med grasmarihand (Dactylorhiza incarnata ssp. incarnata × majalis ssp. traunsteinerioides) er registrert i Yorkshire, Wales og Irland, men er ganske sjeldne. Hybridar med skogmarihand (Dactylorhiza maculata ssp. fuchsii × majalis ssp. traunsteinerioides) og med flekkmarihand (Dactylorhiza maculata ssp. maculata × majalis ssp. traunsteinerioides) er registrerte i Yorkshire, Nordvest-Wales og Irland. I England er det òg funne hybridar med Dactylorhiza majalis ssp. praetermissa.
Referansar
Bakgrunnsstoff
Kategori:Orkidear i Storbritannia Kategori:Orkidear i Irland Kategori:Marihandslekta