Elektroakustisk musikk er ei form for moderne kunstmusikk med røter i det avantgardistiske, eksperimentelle musikkmiljøet i etterkrigstida. Forma oppstod rundt midten av 1900-talet, sterkt påverka av utviklinga av kringkastings- og opptaksteknologi. Komponistane brukte innspelingsteknologi og lydsignalhandsaming for å manipulera klangfargene i akustiske lyder i skapinga av musikkstykke. Fokus er på klang og tekstur framfor tradisjonell melodi og harmoni. Forma blir ofte brukt i konsertinstallasjonar, lydkunst og eksperimentell musikk, og blir gjerne framført via høgtalarar, ikkje nødvendigvis med levande musikarar.
Frå 1950-talet blei det eksperimentert med såkalla konkret musikk, som er nemninga på musikalske komposisjonar med utgangspunkt i opptak av naturlege lydar som blei omarbeidde elektronisk og sette inn i musikalske samanhengar der lyden får ei sjølvstendig verdi. I meir eller mindre omarbeidd form kan musikken vekka heilt andre assosiasjonar enn lyden gjorde i utgangspunktet.
I Köln var elektronische musikk, som blei lansert i 1949-51 av komponisten Herbert Eimert og fysikaren Werner Meyer-Eppler, utelukkande basert på elektronisk genererte (syntetiske) lydar, særleg sinusbølgjer. Byrjinga på utviklinga av elektronisk musikk kan spores tilbake til oppfinninga av radiorøyret i 1906. Musikken kunne spelast inn og framførast gjennom høgtalarar, utan ein menneskeleg utøvar.
Den moderne elektroakustiske musikken har sameint to historiske retningar som tidlegare stod i kontrast til kvarandre – franske Pierre Schaeffer sin konkrete musikk med opptak av ekte lydar omarbeidde og sett saman til musikk og tyske Herbert Eimert, som utvikla elektronisk musikk.
I Noreg blir Arne Nordheim (1931-2010) rekna som pioneren innan musikksjangeren. Av andre norske namn kan ein nemna Kåre Kolberg (1936-2014), John Persen (1941-2014), Åse Hedstrøm (f. 1950), Kjell Samkopf (f. 1952), Ragnhild Berstad (f. 1956), Rune Rebne (f. 1961), Arnt Håkon Ånesen (f. 1977), Agnes Ida Pettersen (f. 1981), Adrian Clemens Di Ruscio (f. 1981), Kristin Bolstad (f. 1981) og Eric Skytterholm Egan (f. 1983).
Notam, norsk senter for teknologi i musikk og kunst, blei skipa i 1992 og arbeider med utvikling og nyskapande bruk av teknologi i musikk, òg innan elektroakustisk musikk.
Kjelder
Denne artikkelen bygger på «Elektroakustisk musikk» frå , den 29. november 2025.
Kategori:Elektronisk musikk Kategori:Musikksjangrar