Lo torisme domina l'economia d'Antigua e Barbuda, e compta per 60% del PIB e 40% dels investiments. La venguda d'un feble nombre de toristas (principalament nòrd-americans) dempuèi la començança de las annadas 2000 l'a alentida e mes lo govèrn dins una situacion financièra dificila. Las principalas industrias son: torisme, construccion civila, e industria leugièra (farda, alcòl, forniments domestics).
La produccion agricòla de las doas illas es focalizada sul mercat interior e constrencha per de ressorsas d'aiga limitadas e paucs trabalhadors disponibles, per encausa dels salaris tròp nauts dels sectors torisme e construccion, que li fan lengueta als joves, fòrça mai que non pas los camps. Los principals produchs d'importacion son alimentacion e cabal, equipament de maquinària e transpòrt, manufacturas, produches quimics e petròli, e los principals produchs d'exportacion son derivats del petròli 48%, manufacturas 23%, equipament de maquinària e transpòrt 17%, alimentacion e cabal 4%, autres 8%.
S'estima que los creisses economics globals per l'an 2000 foguèron de 2,5 del 100. L'inflacion mostrèt una tendéncia a mermar, sota los 2 del 100 per lo periòde 1995-1999, e quitament 0 del 100 per çò que de l'an 2000 se tracha.
De perspectivas de creissença economica a tèrme mejan ne contunharàn totun de dependre de las arribadas de toristas e de l'aumentacion dels revenguts e salaris dins lo mond industrializat, e mai especialament als Estats Units d'America, que representan a quicòm prèp de tres parts una del flux toristic annadièr.
Per tal de redusir la siá vulnerabilitat fàcia a las catastròfas naturalas, Antigua ensagèt de diversificar son economia.Transpòrt, comunicacions e servicis financièrs son cada còp mai importants dins las estructuras e infraestructuras economicas de las illas.
Antigua es sòcia de l'Union Monetària de las Caribas Orientalas (ECCU - Eastern Caribbean Currency Union), de la Banca Centrala de las meteissas Caribas Orientalas (ECCB - Eastern Caribbean Central Bank) qu'emet una moneda comuna, lo dolar de las Caribas Orientalas. Per totes los membres de l'ECCU, l'ECCB utiliza tot parièr la politica monetària per regular e supervisar las activitats bancàrias e comercialas dels païses afiliats.
Antigua e Barbuda se ne benefícian tot parièr, malgrat çò sovent ambigú de la causa, de l'Iniciativa dels EUA pel desvolopament de la Conca caribenca o Caribbean Basin Initiative. En 1998, las exportacions antiguesas cap als Estats Units aumentèron de gaireben los 3 milions de dolars quand las siás importacions de produches estatsunidencs, ne totalizèron 84, a quicòm prèp. Tanben n'aperten l'archipèla a l'esfèra anglofòna e senhorejaira dins lo parçan, de la CARICOM/Caribbean Community o Comunitat Cariba.
Nòtas & referéncias
Antigua e Barbuda Categoria:Antigua e Barbuda