Tremp

Tremp es un municipi de la província catalana de Lhèida, de la Comunautat Autonòma de la Generalitat de Catalonha e de la comarca de Palhars Jusan.

Toponimia Tremp La prononciacion es [trem]. Lo gentilici es plan singular : trempolins. Las fòrmas ancianas son : ad Trimplo en 839, puèi res pendent mai de dos sègles, in loco vocitato Tremp en 1079, Tremp en 1109, 1175, 1211, 1230-1257, 1242, etc. Sembla qu'en 839, Trimplo es mai lo nom d'un airal que d'una aglomeracion. L'origina del nom es malaisida. Těmplum es improbable, pr'amor (subretot) del timbre de la vocala e de l'avaliment de l. Tr- es pas una iniciala ispanica preindoeuropèa : en ibèr T- + vocala non se tròba gaire e Tr- jamai, en basc ni l'un ni l'autre. Donc Tremp pòt èsser prelatin, mès indoeuropèu. Talarn, Segú, Segant, Sellemana son celtics, Carant (nom frequent), Seix, sorotaptics (de la cultura dels camps d'urnas, pus anciana), probablament tanben Salàs e Farmicó, tots en Palhars Jusan. La primièra ipotèsi (A) de Joan Coromines es *Trímporo, que patiguèt de dissimilacions divergentas de la segonda -r-, una que la càmbia en -l-, d'aquí la fòrma Trimplo e lo gentilici trempolin, l'autra que l'elimina francament. L'estructura d'aquel nom es clarament indoeuropèa, puèi que l'iniciala *Tr- es estrangièra a l'ibèr e al basc e que -ro es un element amplificator frequent en indoeuropèu. D'un autre costat, p es pas celtic, grop indoeuropèu qu'amudís aquel son, que tornèt pus tard çaquelà dins qualques lengas [dont lo gallic], òr l'arribada dels cèltas es trop anciana en Ispània. Lo rasonament mena a la pista sorotaptica [Coromines considèra implicitament que los cèltas palhareses son d'origina ispanica e negligís lo fait que lo celtisme del Palhars Jusan, isolat del territòri celtibèr, pòt venir del nòrd gal tanplan coma del sud, sense comptar que los noms cèltas d'aquela comarca son completament fresques e son versemblablament recents, pauc anteriors a la romanizacion]. Coromines cita los mots de las lengas indoeuropèas que pòdon semblar *trimporo : lo sens general n'es « sadol, fart, afartat, satisfait, etc »; aquels noms contenon un -p- indoeuropèu, eliminat de totas las lengas celticas. *Trímporo auriá pogut designar un lòc fertil e plan asagat, la Conca de Tremp, en contraste net ambe los puèges vesins. Après d'autres aprigondiments e temptativas, J. Coromines passa a la segonda ipotèsi (B), que finalament causís puslèu (e una sintèsi o influéncia recipròca de las doás ipotèsis). Trumplia es un toponime de Mesia inferiora, los Trumpilini son un pòble d'Italia del nòrd (variacion trumplini), Trumpli (seriá dins l'actuala Val Trompia); tot aquò sembla Trimplo e los trempolins. D'un autre costat, los ligurs foguèron indoeuropeanizats pels sorotaptes que venián de l'airal prealpin; los trabalhs sul lepontic mòstran un dialècte diferent del celtic, mai o mens lo sorotaptic [lo lepontic es generalament considerat ara coma una lenga o un dialècte celtic, ambe P (de l'indoeuropèu kw), diferent del gallic cisalpin]. L'explicacion de Tremp seriá dins los Trŭmpĭlini, ambe metatèsi posteriora (*Trompil- > *Trimpol-), d'aquí los trempolins e un nom *Trímpolo > Trimplo (fòrma de 839), que presentava un acorchiment esitant, *Trempo [dissimilacion]. Trempolí pòt èsser pus ancian que lo nom de la localitat. L'ipotèsi A e l'ipotèsi B pòdon coïncidir dins la rasic TRMP-, ambe l'idèa d'un país d'abonde, qu'assadola Joan Coromines, Onomasticon Cataloniæ, vol. VII, p. 342-345 https://web.archive.org/web/20210212071618/https://oncat.iec.cat/veuredoc.asp?id=44617. En acceptant l'identitat (o la parentat) dels trumpilini e del nom de Tremp, puèi que lo lepontic, lenga probabla dels trumpilini, es una lenga celtica ambe P (de l'indoeuropèu kw), lo recors al sorotaptic (o al ligur), una lenga preceltica qu'auriá conservat lo p indoeuropèu primitiu, ven completament inutil; una consequéncia, acceptada implicitament per Coromines, es que lo celtisme palharés es pas d'origina celtibèra, puèi que la lenga d'aquels non coneissiá de p, de quina origina que siá. Una autra consequéncia es que l'etimologia de Tremp a pas res a veire ambe l'idèa d'afartar, puèi que los mots de las lengas indoeuropèas que Coromines i associa contenon lo p indoeuropèu primitiu, amudit dins tota las lengas celticas, dont lo lepontic. Vilamitjana Vilatge a 6 km de Tremp. Lo nom es atestat en 1359, Vila Mijana, VilamijanesJoan Coromines, Onomasticon Cataloniæ, vol. VIII, p. 19 https://web.archive.org/web/20210802002843/https://oncat.iec.cat/veuredoc.asp?id=46901. Lo sens de l'adjectiu es pas explicitat, s'agís de « vila(tge) entre autres », aicí entre Tremp e Gavet de la Conca, Suterranya, etc. Suterranya Atestat Sotarranya en 1359. La prononciacion es [sute'rraɲa]. Ven de segur del latin (villa) subterranea. Las roïnas del vilatge anterior a Suterranya se veson encara dins una comba jos lo vilatge actual Joan Coromines, Onomasticon Cataloniæ, val. VI, p. 468 https://web.archive.org/web/20210921102924/https://oncat.iec.cat/veuredoc.asp?id=39912. Lo nom designariá l'ancian vilatge après que foguèt abandonat. Autra possibilitat : per comparason ambe Pui(g)falconer (1242 : la vila dez Pui... dez Pui Falc(h)oner Joan Coromines, Onomasticon Cataloniæ, vol. VI, p. 297 https://oncat.iec.cat/veuredoc.asp?id=32829, ancian vilatge pus naut dins un site escalabrós, al nòrd-èst, desabitat i a bèla pausa a l'avantatge de Suterranya, mès i pòt aver un problèma de data. Palau de Noguera Ven del latin palatium Joan Coromines, Onomasticon Cataloniæ, vol. VI, p. 133-134 https://web.archive.org/web/20240808164324/https://oncat.iec.cat/veuredoc.asp?id=30105. Aulàs Aulàs es situat a 8 km d'Aulet, al sud-èst, de l'autra part de la Noguera Ribagorçana. La prononciacion es [aw'las]. La diferéncia ambe Aulet es lo sufixe collectiu plural -ares contra lo sufixe collectiu -etum. Las fòrmas ancianas son Eulas a l'entorn de l'an 1000, castello Aulas cap a 1100, Aulas en 1385. Lo sufixe non pòt èsser -aç : s e ç èran pas neutralizats abans 1500 al nòrd-oèst catalan. Aulàs ven de ebulus, « èule », ambe -ares Joan Coromines, Onomasticon Cataloniæ, vol. II, p. 276-277 https://oncat.iec.cat/veuredoc.asp?id=4633. Espluga de Serra, Esplugafreda Espluga de Serra èra un ancian Espluga Tresserra, just darrèr la sèrra que separa lo Palhars Jusan e l'Auta Ribagorça : trans serram; un còp casuda la primièra r per dissimilacion, lo nom foguèt comprés coma de serra Joan Coromines, Onomasticon Cataloniæ, val. VII, p. 348 https://web.archive.org/web/20210729191731/https://oncat.iec.cat/veuredoc.asp?id=17743. La prononciacion d'Esplugafreda es [espluga'fredɛ]. Las fòrmas ancianas son Spluca Freta en 988, Sclupluca Freta a la fin del sègle XI, Spelunca frigida, cap a 1080. Lo mot catalan espluga correspond a espeluga, balma. I a tres possibilitats : 1) espluga freda (frigida), 2) espluga freta (fracta, « copada ») e 3) lo nom d'òme probablament germanic *Spanufreda, que pareis dins los documents en tant que propietari dins l'airal. I a en 913 un terra de Spanufreda e pas de vertadièra espluga. La dificultat es çaquelà extraordinària per passar foneticament del nom germanic d'òme al nom actual. XT (non Coromines) causís Spanufreda e JC espluga freta, motivat per l'impressionant amàs rocós dit Cova d'Urso (nom precatalan), que pòt semblar una espeluga esbodelada Joan Coromines, Onomasticon Cataloniæ, vol. IV, p. 132-134 https://web.archive.org/web/20210803102245/https://oncat.iec.cat/veuredoc.asp?id=17747. Pui(g)cercós Lo segond element deriva d'una varianta en latin vulgar de quercus, « casse », que en estant remplaçat per alzina coma apellatiu, garda una plaça en toponimia. Querquus (del latin classic querqus [quercus]) foguèt modificat en Cerq(u)us per dissimilacion, atal coma quinque menèt a cinque. Cercós es un derivat ambe'l sufixe -osu-, [que designava un lòc ont i aviá plan de casses]. Puicercós es atestat en 1306 Podii Cercosii e en 1359 Puigcercós Joan Coromines, Onomasticon Cataloniæ, vol. III, p. 351-353 https://web.archive.org/web/20241111204953/https://oncat.iec.cat/veuredoc.asp?id=32784. Gurp Dit Gurp de la Conca per oposicion a Gurb de la Plana, près de Vic. La prononciacion es [gurp]. Las fòrmas ancianas son in castro Gorvi en 969, in castro Guirbi en 969, kastro Gorvi en 974, Gurbi en 979, kastro Guirbi en 979, de Gorvi... de Gurvi en 980, Guirbi a la fin del sègle X. Los dos Gurp son al pè de tucas peirosas. I a donc la postposicion iberobasca -be. Lo sens seriá donc « jos la rojor » (gorri = roge). En realitat, aquels tuquets son puslèu grises, eventualament ambe de tacas jaunassas, o son de la color de la tèrra après una usclada, sense vegetacion e la toponimia basca s'opausa pas a l'emplec de gorri dins aquels cases. Las fòrmas pus ancianas son en o (gorri + be) e passan a u per metafonia (influéncia barranta de -i, donc *gorribe > *gurribe), necessàriament abans la sincòpa que suprimís -i- interior. I demorèt pro de temps per que b passe a v, segon l'exemple de las mencions Gorvi, etc. Çaquelà, d'autras mencions fornisson una sincòpa anciana, çò que fa pensar a doás viás evolutivas parallèlas [donc un important polimorfisme]. Pr'aquò, benlèu que lo punt de partença èra diferent, çò que las mencions Guirbi fan supausar. Caldriá partir de *Górbĭe, siá una evolucion de *Gorri-be, siá pr'amor d'una particularitat del basc local [improbable]. Après, per anticipacion de ĭ, lo nom passa a Gúĭrbe, -i. Aquò explicariá las fòrmas en -i, Gorbi, Gurbi Joan Coromines, Onomasticon Cataloniæ, vol. IV, p. 413 https://web.archive.org/web/20250114132333/https://oncat.iec.cat/veuredoc.asp?id=21414. Castissent La prononciacion es [kasti'sen]. Las fòrmas ancianas son Castrum Castello Sancto en 1077, Castelli Sancti en 1100, Castedsent en 1180-1190, Castel Sent en 1277, Castell Sent en 1359, etc. Lo nom ven de Castellum Sancti, « castèl de Sanç o Sanctius », ambe anct > aint > ent, coma lo catalan ancian sent, varianta de sant Joan Coromines, Onomasticon Cataloniæ, vol. III, p. 330 https://oncat.iec.cat/veuredoc.asp?id=13684. Eroles La prononciacion es [a'roles]. Las fòrmas ancianas son Croles (legir Eroles) en 1056, Eroles en 1077, 1149, Erolas en 1119, 1157, Aroles en 1359. Cf. L'Airòl a Sant Joan de Pladecorts. Aroles es un diminutiu del catalan era, del latin area, occitan aira o ièra Joan Coromines, Onomasticon Cataloniæ, vol. IV, p. 86 https://web.archive.org/web/20211022103835/https://oncat.iec.cat/veuredoc.asp?id=17303. Sapeira La prononciacion es [sa'pejra]. Las fòrmas ancianas son illa Petra en 979, Ipsa Petra en 1080, Sapera en 1359. Sembla qu'un document de 826 cite Sapeira : in castro Orritense, in parte Or. in locum cuius vocab. est Saxsa (ròcas, del latin classic saxa), traduccion [aproximativa !] de ipsa petra Joan Coromines, Onomasticon Cataloniæ, vol. VII, p. 159 https://oncat.iec.cat/veuredoc.asp?id=37560. Pèira ambe l'article mai o mens arcaïc sa (de ipsa). Tamúrcia (La Torre de, Masos de) Prononciacion : ['torre de ta'mursĭa], mès se ditz puslèu La Torre. Lo lòc es atestat Tamureces en 837, illa Torre en 984, loch de la Torra d'Oulet en 1359 (Aulet, Ribagorça, a l'oèst). L'etimologia sembla Mūrĭcĭnus, « merlet, defensa d'una tor ». Partem de turris mūrĭcĭnos, al genitiu turris, « las muralhetas de la tor » > torsmurécens, puèi dissimilacion en Tarmurécens, e una autra en Tamurécens, quasi la fòrma de 837 (l'accent se desplaça sus ū). Lo passatge a Tamúrcia es complicat (expliqui pas los complèxes rasonaments de J. Coromines), simplament l'influéncia de -a de torra per arribar a Tamúrcia. A costat, i a un autre lòc, Serrat de Tamars (-ars ambe -r- articulada), de inter ambos arcus (o arços, plural de arç, « mata, bartàs, boisson ») qu'a benlèu influénciat Joan Coromines, Onomasticon Cataloniæ, vol. VII, p. 226-227 https://web.archive.org/web/20231210214522/https://oncat.iec.cat/veuredoc.asp?id=42577. El Pont d'Orrit