Màrius Jovau (en nòrma mistralenca: Marius Jouvau o Marius Jouveau;Frederic Mistral utilizava lo nom occitan Màrius Jovau (en grafia mistralenca: Marius Jouvau), çò que se pronóncia [ʹmarjys dʒuʹvaw]. Per còntra l'interessat utilizava sovent lo nom francés Marius Jouveau [maʁjys ʒuvo] e mai quand escriviá en occitan. en francés: Marius Jouveau) (Avinhon 1878, Ais 1949) es un poèta provençau de lenga occitana. Foguèt capolier dau Felibritge de 1922 a 1941.
Biografia Lo paire de Màrius èra Ausiàs Jovau (1847-1917), portaire de profession, musician e cançonier, collaborador de l'Armanac provençau e dau Brusc, que venguèt Majorau dau Felibritge en 1897.
Màrius Jouveau foguèt licenciat en lenga e literatura italianas. En 1910 foguèt escolan de l'Institut Francés de Florença, que i gardèt de contactes tota la vida.
Foguèt mobilizat lo 2 d'aost de 1914 per la Primiera Guèrra Mondiala. Anèt au frònt dau 8 de julh de 1915 au 30 de genier de 1919. Recebèt la Crotz de Guèrra. Ne publiquèt puei sei Nòtas de guèrra.
Comencèt sa carriera d'ensenhaire en essent repetitor successivament au collègi de Manòsca de 1808 a 1900, au collègi d'Arle de 1900 a 1913, au licèu de Dinha en 1913 e au licèu d'Ais en 1913. En 1920 foguèt nomenat professor adjonch au licèu d'Ais.
Intrèt dins lo Felibritge en 1907 e publiquèt Éléments de grammaire provençale et petit manuel de l’instituteur provençal pour la correction des provençalismes. Venguèt Majorau dau Felibritge en 1913.
Foguèt lo fondador de la revista Fe, dau mesadier En tèrro d'Arle (1907-1912), director de la revista Lo Felibritge (1919-1945), fondador de l'Escòla Mistralenca d'Arle e director de l'Armanac Provençau.
Lo 11 d'aost de 1940, Jovau escriguèt una letra au Marescau Philippe Pétain que, dedins, diguèt que la «Revolucion Nacionala» e lo Felibritge partejavan lei meteissei valors. Prepausèt au marescau de consultar lei felibres a prepaus de l'organizacion dei províncias. Escriguèt au ministre de l'Educacion Nacionala per qu'entreprenguèsse la revision dei programas escolars per fin d'i introduire l'istòria e lei lengas «localas». Afirmèt dins Fe : «En restaurant la disciplina patriotica dei país, de la region, unit per sei tradicions, per sa fe istorica, òm deu restaurar França».
Lo fiu de Màrius foguèt lo felibre Rainier Jovau (1906-1997). La bibliotèca de Rainier, acampada per mai d'una generacion, foguèt balhada au CIRDÒC de Besièrs en 2006.
Distincions Foguèt nomenat oficier d'acadèmia lo 14 de julh de 1910 e oficier de l'Instruccion Publica lo 14 de julh de 1920.
Foguèt fach cavalier de la Legion d'Onor lo 10 d'octòbre de 1927.
Òbras
Éléments de grammaire provençale et petit manuel de l'instituteur provençal pour la correction des provençalismes, Marselha, 1907 (descargable en cò de Cièl d'Òc). Sèt cançons d'Arle, poèma provençau, traduccion francesa de l'autor (Sèt cansoun d'Arle, pouèmo prouvençau, traducioun francesco de l'autour), Ais, 1930 (amb Fredéric Mistral nebot, Pèire Fontan, Brunon Durand, Rainier Jovau e Pèire Asemar) Aspects de Mistral: l'Homme, le poète, le philologue, le sage, le politique, Marselha, 1930 L'Étymologie par le provençal à l'école primaire, Ais, 1939 Discours de Mistral, Ais, 1941 A la gràcia dau temps, poèmas e sovenirs de Màrius Jovau (À la gràci dóu tèms, pouèmo e souveni de Marius Jouveau), publicats per Rainier Jovau, Ais, 1960
Amb Rainier Jovau, Discors de capolier (Discours de Capoulié), publicat per Maria Terèsa Jovau, Marselha, 1995 (descargable en cò de Cièl d'Òc). Pòntgibós, cònte comtadin (Pontgibous, conte coumtadin), Marselha, 1996
Bibliografia
Stèle pour deux poètes. Marius Jouveau 1878–1949. Joseph d'Arbaud 1872-1950, Aix-en-Provence, 1960 Correspondance de Frédéric Mistral et E., F. et Marius Jouveau 1877–1913, publiée par Marie-Thérèse Jouveau, Aix-en-Provence 1993 Jean Fourié, Dictionnaire des auteurs de langue d’oc de 1800 à nos jours, Aix-en-Provence 2009 s.v.
Referéncias
Ligams extèrnes
Categoria:Naissença a Avinhon Categoria:Cavalièr de la Legion d'Onor Categoria:Poèta occitan Categoria:Poèta francés del sègle XX Categoria:Capolier dau Felibritge Categoria:Majorau dau Felibritge