Ël tìtol onorìfich ëd Céser a l'é nàit durant la formassion dl'Imperi Roman e a l'ha avù efet për squasi mila e sinchsent agn an Roma e Costantinòpoj. A l'ha avù un gran anfluss ëdcò ansima ai tìtoj ëd vàire àutre popolassion, ëd dand-je adoss a espression coma Kaiser e Czar.

Etimologìa Ën avend ardità 'l podèj polìtich ëd Giulio Céser, August a l'avìa car ëd fesse ciamé tan-me chiel. Caesar a l'era comsëssìa na part ëd sò nòm ëd famija, donca a l'era nen na ròba fòra-via. La dinastìa Giulio-Clàudia ch'a l'é anandiasse con chiel a l'é durà dal pì al manch për un sécol (da Giulio Céser a Neron). Al pòst dë droché, ës nòm a l'é viaman passà a indiché na condission polìtica, e na vira ch'a l'é rivasse a la dinastìa Flavia e a Vespasian, Tito e Domissian, l'espression Caesar a l'avìa giumaj d'autut smonusse për la stra sò valor ëd cognòm, për ëvnì a esse un tìtol. thumb|left|Ij tetrarca, scultura dël V sécol dGC La Tetrarchìa Dapress a j'arforme polìtiche ëd Dioclessian, ës tìtol a ven a pijé un sust pì nen mach onorìfich, ma sostansial, e bin dëstacà da cola d'August. Ant ël sistema polìtich dla Tetrarchìa ël Céser a resta la përson-a ch'a comanda la mità anferior an gerarchìa d'un dij doi Imperi comandà mincadun da sò August. Ël Céser a l'avrìa nen dë esse parent dl'August, ma pitòst dë esse sërnù coma aministrator an piòta, për feje da agiut e peui da sucessor a l'August. As trata d'un sistema ch'a travaja nen, e che a dròca bele sùbit, dapress a l'arvira ëd Costantin.

Imperi roman d'Orient Ant l'Imperi Roman d'Orient, ël tìtol grecisà ëd kaisar a resta pen-a dadré a col dël Patriarca ëd Constantinòpoj e a l'ha drit a porté na coron-a (mach sensa cros ansima). Ën essend a un livel àut parej, a l'é considerà giust për un prinsi real, un regent ò pura n'amperador designà. Col temp però ij tìtoj a Costantinòpoj as anflassion-o, e a la fin dle fin ëd Céser a-i në j'é tròp. Sòn a men-a Alessi I Comnen a creé na dignità pì àuta, ciamà Sebastokratôr, për dejla a sò frel Isach. A son ëd temp d'arforme dla strutura dël podej amperial dl'Imperi d'Orient, ch'a sta ëvnisend viaman pì feodalisà a la meuda latin-a, e pen-a dapress a lòn Manuel I Comnen a crea 'l tìtol ëd Déspota, ch'a jë sta dzora tant ël Céser che al Sebastokratôr. Dj'ùltim temp dl'Imperi ij tìtoj as moltìplico anco', an proporsion anversa al teritòri dl'Imperi midem.

Categorìa:Tìtoj nobiliar roman