thumb|Bust ëd Pìndar Pìndar (an grech: Πίνδαρος, Píndaros; 518 aGC – 438 aGC) a l'é stàit un poeta grech, considerà ël pì grand esponent dla lìrica coral e un dij neuv poeta lìrich canònich dla Grecia antica. Quintilian a lo definìa "dë 'd longh ël pì grand dij poeta lìrich, për soa magnificensa ispirà".
Biografìa Pìndar a l'era nassù dël 518 aGC (o dël 522) a Cinosefale, un vilagi davzin a Tebe, an Beòssia, da na famija nòbil. A l'ha compì sò aprentagi poétich a Atene andoa a l'é stàit anlev dël poeta Laso d'Ermion. Sò prim componiment atestà a l'é la Pìtica X, scrivùa dël 498 aGC për un giovo dla dinastìa dj'Alevad ëd Tessaja.
A l'é stàit un poeta itinerant, an viagiand për tut ël mond grech e vivend a le cort ëd sovran e famije potent, dzortut an Siracusa (dal tirann Ieron) e an Agrigent (dal tirann Teron). Ambelessì a l'ha ancontrà ij sò rival Simònide e Bachìlide.
A l'é mòrt dël 438 aGC a Argh.
Euvre L'euvra ëd Pìndar a l'é stàita arcujìa an 17 lìber dai filòlogh alessandrin (an particolar da Aristofan ëd Bisansi), dividùa për géner: imn, pean, ditiramb, prosòdi, parteni, iporchema, encomi, tren e epinissi.
A son rivane mach antregh ij quatr lìber dj'epinissi (Olìmpiche, Pìtiche, Nèmee, Ìstmiche), visadì ij càntich për ij vincitor dle competission atlétiche pan-eléniche (Gieugh Olìmpich, Gieugh Pìtich, Gieugh Nème e Gieugh Ìstmich).
Stil e amportansa La poesìa ëd Pìndar a l'é avosà për l'ardità dle metàfora, la concision dël lengagi e ij trat ëd fantasìa ch'a l'han daje l'agetiv "vòl pindàrich".
Sò pensé a s'ispira a l'ética aristocràtica: la virtù (areté) a l'é in-nàita, trasmëtùa për sangh e stirp, nen otnìbil con l'esercissi. Sò epinissi a son organisà antorn a tre part: Elogi dël vincitor e 'd soa famija Mit (generalment al sénter) colegà a la stirp dël vincitor o a sò pais d'orìgin Gnòme (màssima moral) ch'a dà na meditassion pì ancreusa an sl'esistensa uman-a.
A l'é stàit apressià da Goethe, Foscolo, Leopardi e Hölderlin (ch'a l'ha traduvù tute le Pìtiche e part dle Olìmpiche).
Categorìa:Literatura greca Pindar